Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 289 Hüküm no: 341 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avraham v. İsak’ın oğlu Hayim ile hanımı Refaka bt. İsak’ın ortak oldukları evi İsak v. Yagob’a satmaları Mahmiye-i Kostantıniyye -humiyet ani’l-âfât ve’l-beliyye- mahallâtından Çelebioğlu mahallesi sâkinlerinden iken bundan akdem mürd olan Avraham v. İsak nâm yahudinin sulbî oğlu Hayim nâm yahudi ve zevce-i metrûkesi Refaka bt. İsak nâm nasrâniye meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb İsak v. Yagob nâm yahudi mahzarında her biri bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Hasköy mahallâtından Keçeciler mahallesinde vâki‘ bir tarafdan hâssabahçe üstâdı Ahmed Bey b. Abdullah mülküne ve bir tarafdan İlya v. Odor mülküne ve bir tarafdan Yakof v. Romano nâm yahudi mülküne ve bir tarafdan tarîk-i âma müntehî ve mahdûd olup iki fevkānî beyti ve ortasında sofayı ve altında hücreyi ve üç matbahı ve üç kenîfi ve dört su kuyusunu ve bir selâmlığı ve eşcâr-ı müsmire ve gayr-ı müsmireyi hâvî cüneyneyi müştemil her sene altmış beş akçe mukāta‘alı mürd-i mezbûrdan ikimize irs-i şer‘le intikāl eden müşâ‘ ve müşterek mülk menzili cümle-i tevâbi‘ ve levâhıkı ile mezbûr İsak’a altmış üç bin nakd-i fıddî-i Osmânî râyic fi’l-vakt akçe ki te’kîdü’l-asl nısfı otuz bir bin beş yüz akçe eder ve on yedi buçuk akçe kıymetli bir çift la‘l taşı bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd merkūm İsak’ın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın minvâl-i muharrer üzre cârî olan ikrâr ve takrîrlerini el-mukarru lehü’l-mezbûr İsak vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’s-sânî ve’l-ışrîn min Şa‘bâni’l-mu‘azzam li sene 1029. Şuhûdü’l-hâl: Perviz b. Abdullah, Ali b. Abdullah, Yakub b. Kurd, Şaban b. Yusuf, Yahuda v. Harun, Keresun v. Sabatay, Avraham v. Lavit ve gayruhüm.