Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 291 Hüküm no: 344 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Sadi’nin evini Ayşe bt. Ali’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Aşçıbaşı mahallesi sâkinlerinden Mustafa Bey b. Sadi nâm bevvâb-ı sultânî meclis-i şer‘de işbu hâmiletü hâze’l-kitâb Ayşe bt. Ali nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Abdi Beşe b. Sadi nâm râcil mülküne ve bir tarafdan Mehmed Beşe b. Durak nâm râcil mülküne ve bir tarafdan tarîk-i âma ve bir tarafdan tarîk-i hâssa müntehî ve mahdûd bir tahtânî beyti ve hayâtı müştemil olup mülk-i mevrûsum olan mülk menzilimi cümle-i tevâbi‘ ve levâhıkı ile merkūme Ayşe Hâtun’a dört bin nakd-i fıddî akçeye bâtten bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd merkūme Ayşe’nin mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûre Ayşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 23 min Şa‘bâni’l-mu‘azzam li sene 1029. Şuhûdü’l-hâl: el-Hâc Turgud b. Durak el-Müezzin, Hasan Halîfe b. Abdi el-İmâm, Bâkī Çelebi b. Receb er-Râcil, Mahmud b. Abdi, Abdullah b. Maden, el-Hâc İbrahim b. Mehmed, İsmail b. Ahmed, Yakub b. Kurd, Hasan b. Alemşah, Perviz b. Abdullah ve gayruhüm mine’l-hâzırîn.