Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 292 Hüküm no: 345 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. İstati’nin evini Dado’nun çocukları Duka ve Dimo’ya satması Vilâyet-i Rumeli’nde Avlonya sancağında Ergirikasrı kazâsı tevâbi‘inden Sarakiste nâm karye sâkinlerinden Yani v. İstati nâm zimmî, işbu hâmilân-ı hâze’l-kitâb Duka ve Dimo veledey Dado nâm zimmîler muvâcehelerinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yorgo [v.] Bozacı mülküne ve bir tarafdan Yorgo v. Mariş mülküne ve bir tarafdan Duka v. Yani mülküne ve bir tarafdan tarîk-i âma müntehî olup bir tahtânî beyti müştemil mülk menzilimi cümle-i tevâbi‘ ve levâhıkı ile merkūmân Duka ve Dimo’ya sekiz bin nakd-i fıddî akçeye bâtten bey‘ edip meblağ-ı mezbûru merkūmân Duka ve Dimo yedlerinden ale’l-iştirâki’s-seviy tamâmen ahz ve kabz eylediğimden sonra meblağ-ı mezkûru mahallinde kabza müşteriyyân-ı merkūmânı taslît eyledim ba‘de’l-yevm sâlifü’l-beyân menzil-i mahdûd merkūmân Duka ve Dimo’nun mülk-i müşterâ-yı sarîhleridir keyfe mâ yeşâân ve haysü mâ yürîdân mutasarrıf olsunlar dedikde mukırr-ı mezbûrun ikrârı el-mukarru lehümü’l-mezbûrân vicâhen ve şifâhen tasdîk ve tahkīk ettiklerinde mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Şa‘bâni’l-mu‘azzam li sene 1029. Şuhûdü’l-hâl: Mustafa b. Mahmud el-Muhzır, Ali b. Abdullah el-Muhzır, Perviz b. Abdullah el-Muhzır, Hırsaki [v.] Yako, Meniko v. Dimo, Dimitri v. Minho, Şiro v. Yako, Yani v. Dimo, Yani v. Miro, Yani v. Dimo, Kini v. Diro ve gayruhüm mine’l-hâzırîn.