Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 293 Hüküm no: 348 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kika v. Petro’nun bağ ile tarlaların tasarruf hakkını Kika v. Petro’ya satması Vilâyet-i Rumeli’nde Ohri sancağında İstarova kazâsına tâbi‘ Büyükçizme nâm karyeden Kika v. Petro nâm zimmî meclis-i şer‘de hâmilü’l-kitâb Kika v. Petro nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ lede’l-ahâlî ma‘lûmü’l-hudûd bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Kika’ya altmış nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine karye-i merkūme sınırında mevâzi‘-i adîdede vâki‘ taht-ı tasarrufumda olan üç kıt‘a tarlalarımın hakk-ı tasarrufunu sâhib-i arz ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan yüz nakd-i mezbûrü’n-na‘t akçeyi mezbûr Kika yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bağ-ı mahdûd mezkûrun mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu mersûmundur sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Kika bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis min şehri Ramazâni’l-mübârek li sene tis‘a ve ışrîn ve elf. Şuhûdü’l-hâl: Ali b. Abdullah el-Muhzır, Ahmed b. Mustafa, Veli b. Hasan, Perviz b. Abdullah el-Muhzır, Mustafa b. Ahmed, Mihayil v. Beyto, Beyto v. Viliçe, Köko v. Pavlo.