Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 298 Hüküm no: 355 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola’nın koyun ve keçi davasında Anastaş ve Senadino ile sulh olması Vilâyet-i Rumeli’nde Mora sancağında Kartina kazâsına tâbi‘ Kerniye nâm karye sâkinlerinden Nikola v. ( ) nâm zimmî meclis-i şer‘de işbu hâmilân-ı hâze’l-kitâb Anastaş ve Senadino nâm zimmîler tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında İstemad v. Andriye ve Nikola v. Dayan nâm zimmîler şehâdetleri ile şer‘an sâbite olan mezbûrânın karındaşı Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem müvekkilân-ı mezbûrâna yüz koyun ve altmış keçi verdim idi ra‘y edip fürû‘u beynimizde tansîf olmak üzre hâlâ zikr olunan koyundan elli yedi koyun mevcûd bulunup ahz eylediğimden sonra bâkī kalan kırk üç koyun ve altmış re’s keçiyi da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip es-sulhu seyyidü’l-ahkâm fehvâsınca iki bin akçe üzre akd-i sulh inşâ ettiklerinde ben dahi sulh-i mezbûru kabûl ve bedel-i sulh olan meblağ-ı mezbûru müvekkilân-ı mezbûrân yedlerinden bi’t-tamâm ahz ve kabz edip husûs-ı mezbûra müte‘allik da‘vâdan müvekkilân-ı mezbûrânın zimmetlerini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun minvâl-i muharrer üzre cârî olan ikrâr ve takrîrini vekîl-i mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî 3 min Ramazâni’l-mübârek li sene 1029. Şuhûdü’l-hâl: Ali b. Abdullah, Perviz b. Abdullah, Yakub b. Kurd, Yani v. İstemad, Nikola v. Dayan, İstemad v. Andriye, Hristatli v. Papa, Yorgi v. Vasoni ve gayruhüm.