Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 297 Hüküm no: 354 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şatır Ali Vakfı mütevellisi Ümmühâni bt. Ali’nin eski mütevellideki vakfa ait parayı alması Medîne-i Ebâ Eyyûb-i Ensârî -râdiye anhu Rabbühü’l-Bârî-’de vâki‘ merhûm Şâtır Ali vakfı’na ber vech-i meşrûtiyyet mütevellîye olan Ümmühân bt. Ali nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb vakf-ı mezbûra sâbıkan mütevellî olan Mustafa Halîfe b. Sevindik nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip bundan akdem vakf-ı mezbûr malından Hüsam Efendi b. ( ) nâm kimesne zimmetinde yüz bin nakd-i fıddî-i Osmânî râyic fi’l-vakt akçe olup mezbûr Hüsam Efendi fevt oldukda mezbûr Mustafa Halîfe metrûkâtından ancak on bin nakd-i mezbûrü’n-na‘t akçe tahsîl ettim deyû ikrâr eylemişidi el-hâletü hâzihî meblağ-ı mezbûr on bin nakid akçeyi tevliyyet-i mahkiyem hasebiyle mezbûr Mustafa yedinden vakf-ı mezbûr için bi’t-tamâm ve’l-kemâl ahz ve kabz eyledim dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Mustafa Halîfe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî ve’l-ışrîn min Şa‘bâni’l-mu‘azzam li târihi’l-mezbûr. Şuhûdü’l-hâl: Ali Ağa b. Abdülmennân, Hasan Halîfe b. Mehmed, Abdurrahman Efendi b. Abdullah el-İmâm, Keyvan Bey b. Abdullah, el-Hâc Turgud b. Durak el-Müezzin, el-Hâc Osman b. Hamza, Mustafa b. Hayrullah el-Müezzin, Hasan Halîfe b. Mustafa, Mustafa b. Süheyl, Abdullah b. Mehmed, Mustafa Halîfe b. Receb, Ali b. Abdullah, Mustafa b. Mehmed ve gayruhüm mine’l-hâzırîn.