Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 300 Hüküm no: 358 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yorgi’nin mülk bağını Yorgi v. Franko’ya satması Vilâyet-i Rumeli’nde Apogros kazâsına tâbi‘ Sabtişe nâm karye sâkinlerinden Nikola v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgi v. Franko nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında vâki‘ bir tarafdan Yani v. Virato mülküne ve bir tarafdan Nikola v. ( ) mülküne ve bir tarafdan İstemad v. Papalani mülküne ve bir tarafdan Yorgi v. ( ) mülküne müntehî ve mahdûd tahmînen on çapalık bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Yorgi’ye üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlif[ü’l-beyân] bir kıt‘a bağ merkūm Yorgi’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yorgi vicâhen ve şifâhen tasdîk ve tahkīk edicek mâ hüve’l-vâki‘ gıbbe’l-ibtigā sebt olundu. Hurrire fî 6 min Ramazâni’l-mübârek li sene 1029. Şuhûdü’l-hâl: Yorgi v. Dimo, Dimo v. Virakli, İstemad v. Papalani, Rako v. Piro, Nikola v. Yani, Dimo v. Morgari, Dimo v. Kalani, Luyizo v. Kalani, Dimo v. Morgari, Nikola v. Virakli.