Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 186 Hüküm no: 158 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ralne bt. Komyoni’nin, bakımını üstlendiği Panayot v. Mihal’in kızı için nafaka bedelini alması gerektiği Cezîre-i Midilli’de Molova sâkinelerinden Ralne bt. Komyoni nâm nasrâniye tarafından husûs-ı âti’l-beyâna vekîl olup Mehmed b. Süleyman ve Cafer b. Musli nâm kimesneler şehâdetleri ile şer‘an vekâleti sâbite olan Diyako v. Manoli nâm zimmî meclis-i şer‘-i hatîr-i lâzımü’t-tevkīrde Panayot v. Mihal nâm zimmî muvâcehesinde üzerine da‘vâ ve takrîr-i kelâm edip müvekkilem mezbûre Ralne’nin hacr ve terbiyesinde olan mezbûr Panayot’un sulbiye kızı Kanakazini nâm sagīre için bin yetmiş dört Ramazân-ı gurresinde Medîne-i mezbûra kadı olan Mehmed Efendi b. Hasan külle yevm farz ve takdîr ettiği dört akçe nafakadan târih-i kitâba gelince müctemi‘ olan üç bin yüz kırk akçeyi vekâletim hasebiyle mezbûr Panayot’dan taleb ederim suâl olunup alıverilmesi murâdımdır dedikde, gıbbe’s-suâl mezbûr Panayot sagīre-i mezbûre sulbiye kızı olup ve mezbûre Ralne nasrâniyenin hacr ve terbiyesinde olduğunu ikrâr lâkin vech-i muharrer üzre nafaka takdîr olunduğu ma‘lûmum değildir deyû cevâb vermekle vekîl-i mezbûr Diyako dahi mûmâ-ileyh Mehmed Efendi’nin imzâsıyla mümzâ ve hatmi ile mahtûm ve târih-i mezbûr ile müverrah hüccet-i şer‘iyye ibrâz etmeğin mûcebince meblağ-ı mezbûr üç bin yüz kırk akçeyi vekîl-i mezbûr Diyako’ya edâ ve teslîme mezbûr Panayot’a tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cumâdelûlâ li sene seb‘a ve seb‘în ve elf. Şuhûdü’l-hâl: Mustafa Çavuş b. Abdullah, Şükrullah Bey b. Mustafa, Abdi Çelebi b. Hüseyin, Baba Resul b. Rıdvan.