Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 313 Hüküm no: 377 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marko v. Petko’nun ev ve bağ ile tarlaların tasarruf hakkının yarısını Mitro v. Yani’ye satması Vilâyet-i Rumeli’nde Avlonya sancağında Arnavud Belgradı kazâsına tâbi‘ Molişte nâm karye sâkinlerinden Marko v. Petko nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mitro v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Todoro v. Çiko mülküne ve bir tarafdan Yani v. Petro mülküne ve bir tarafdan Ahmed b. Ali mülküne ve bir tarafdan Memişah Beşe b. Abdullah mülküne müntehî bir tahtâ[nî] beyti ve zât-ı eşcâr-ı müsmire ve gayr-ı müsmireyi hâvî hadîkayı müştemil mülk menzilimin ve yine karye-i merkūme bağları sınırı dâhilinde vâki‘ tahmînen on çapalık bir kıt‘a mülk bağımın nısfını cümle-i tevâbi‘iyle bi safkatin vâhidetin mezbûr Mitro’ya iki bin üç yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde vâki‘ tahmînen diyârımız keyli ile üç keyl tohum istî‘âb eder mutasarrıf olduğum beş kıt‘a tarlalarımın nısfının hakk-ı tasarruflarını sâhib-i arz ma‘rifetiyle merkūm Mitro’ya tefvîz edip mukābele-i tefvîzde merkūm yedinden bin nakd-i mezbûrü’n-na‘t akçeyi bi’t-tamâm ahz ve kabz eyledim ba‘de’l-yevm sâlifü’l-beyân menzilin ve bir kıt‘a bağın nısfı merkūm Mitro’nun mülk-i müşterâ-yı sarîhidir ve mârrü’z-zikr tarlaların dahi nısfının hakk-ı tasarrufları merkūmundur, keyfe mâ yeşâ ve yahtâr mutasarrıf olsun dedikde mukırr-ı mezbûrun ikrârını el-mukarru lehü’l-mezbûr Mitro vicâhen tasdîk edicek mâ hüve’l-vâki‘ ketb olundu. Hurrire fi’l-yevmi’s-sâbi‘ min Recebi’l-ferd li târihi’l-mezbûr. Şuhûdü’l-hâl: Niko v. Mitro, Minho v. Mozi, Vasil v. Göri, Yani v. Şimka, Yani v. Tomiro, Mitro v. Yani, Yani v. Petro, Todoro v. Niko, Pando v. Petro ve gayruhüm.