Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 312 Hüküm no: 376 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angeli v. Dimo’nun ev, bağ, bahçe ve harman yerini Hristatli v. Dimitri ve Dimo v. Yani’ye satıp tarlalarının da tasarruf hakkını devretmesi Vilâyet-i Rumeli’nde Mora sancağında Kalavrita kazâsına tâbi‘ Rogos nâm karyeden Angeli v. Dimo nâm zimmî meclis-i şer‘-i hatîr-i lâzımü’t-tevkīrde işbu râfi‘ayi’l-kitâb Hristatli v. Dimitri ve Dimo v. Yani nâm zimmîler muvâcehelerinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Lamyo [v.] İspilyot mülküne ve bir tarafdan Yorgi v. Yani mülküne ve bir tarafdan İstamo v. İspilyot mülküne ve bir tarafdan Todori v. ( ) mülküne müntehî ve mahdûd iki tahtânî beyti ve bir samanlığı müştemil mülk menzilimi ve menzil-i mezbûr kurbunda vâki‘ lede’l-ahâlî ma‘lûmü’l-hudûd iki kıt‘a mülk bahçemi ve karye-i merkūme bağları sınırında vâki‘ her biri inde’l-ahâlî ve’l-cîrân ma‘lûmü’l-hudûd iki kıt‘a mülk bağımı ve zikr olunan bağlar kurbunda vâki‘ bir kıt‘a samanlığı ve lede’l-ahâlî ve’l-cîrân ma‘lûmü’l-hudûd iki kıt‘a mülk harman yerimi ve mevâzi‘-i adîdede vâki‘ ma‘lûmü’l-aded kırk dip dut eşcârını cümle-i tevâbi‘ ve levâhıkı ve kâffe-i menâfi‘ ve merâfıkları ile mezbûrân Hristatli ve Dimo’ya bi safkai vâhid on iki bin beş yüz nakd-i fıddî-i Osmânî râyic fi’l-vakt akçeye bâtten bey‘ ve kabz[-ı semen] edip zikr olunan mebî‘leri mahallinde kabza müşteriyyân-ı mezbûrânı taslît eylediğimden sonra yine karye-i mezbûre sınırında mevâzi‘-i müteferrikada vâki‘ her biri inde ahâliyi’d-diyâr ma‘lûmü’l-hudûd ve’l-mikdâr taht-ı tasarrufumda olan sekiz kıt‘a tarlanın dahi hakk-ı tasarruflarını sâhib-i arz ma‘rifetiyle mezbûrân Hristatli ve Dimo’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan bin beş yüz nakd-i fıddî-i Osmânî râyic fi’l-vakt akçeyi mezbûrân yedlerinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler mezbûrân Hristatli ve Dimo’nun mülk-i müşterâ-yı sarîhleridir ve mârrü’z-zikr tarlaların dahi hakk-ı tasarrufları merkūmânındır, sâir emsâli tasarrufları gibi keyfe mâ yeşâân mutasarrıf olsunlar dedikde mukırr-ı mezbûrun vech-i mübeyyen üzre cârî [olan] ikrâr ve takrîrini el-mukarru lehümü’l-mezbûrân Hristatli ve Dimo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb ve imlâ ve tahrîr ve inşâ olunup yed-i tâlibe vaz‘ olundu lede’l-hâce ibrâz ve ihticâc eyleyeler. Hurrire fî 8 min Recebi’l-ferd li’s-seneti’l-merkūme. Şuhûdü’l-hâl: Osman b. Abdullah, Mustafa b. Mehmed, Ali b. Abdullah, Yakub b. Kurd, Süleyman b. Turgud, Kosta v. İstemad, Yorgi [v.] Yani, Dimitri [v.] Nikola, Papa Nikola [v.] Todori, Aleksi v. Dimitri, Panayot [v.] Yorgi, Minho v. Sava ve gayruhüm mine’l-hâzırîn.