Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 315 Hüküm no: 382 Orijinal metin no: [59a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polad’ın çocukları Mehmed ve İbrahim’in ortak evlerini Hüseyin b. Hasan’a satmaları Havâss-ı Aliyye kazâsı müzâfâtından Çatalca nâhiyesine tâbi‘ Baba Nakkāş nâm karye sâkinlerinden Mehmed ve İbrahim ibney Polad nâm kimesneler meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Hüseyin b. Hasan nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ işbu akdin sudûruna değin ale’l-iştirâki’s-seviy silk-i mülk-i sahîhimizde münselik ve münharıt bir tarafdan Mehmed b. Haydar mülküne ve bir tarafdan Süleyman Çelebi b. ( ) mülküne ve bir tarafdan el-Hâc Hasan mülküne ve bir tarafdan tarîk-i âma müntehî ve mahdûd bir tahtânî beyti ve sundurmayı ve ıstablı ve fırını ve zât-ı eşcâr-ı müsmire ve gayr-ı müsmireyi hâvî hadîkayı müştemil olan mülk menzilimizi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Hüseyin’e on sekiz bin nakd-i fıddî-i Osmânî râyic fi’l-vakt akçeye bâtten bey‘ ve teslîm-i mebî‘ edip meblağ-ı mezbûr on sekiz bin nakd-i mezbûrü’n-na‘t akçeyi merkūm Hüseyin yedinden bi’t-tamâm ve’l-kemâl ale’l-iştirâki’s-seviy ahz ve kabz eyledik ba‘de’l-yevm sâlifü’l-beyân mebî‘-i mahdûd merkūm Hüseyin’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın minvâl-i muharrer üzre cârî olan ikrârlarını el-mukarru lehü’l-mezbûr Hüseyin vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Recebi’l-ferd li târihi’l-mezbûr. Şuhûdü’l-hâl: Mehmed Kethüdâ eş-şehîr Müezzinzâde, Mehmed Efendi b. ( ), Süleyman Çelebi b. ( ), [Os]man Kethüdâ b. ( ), Veli Dede b. ( ), Hasan Hâce el-Müezzin, Mustafa Beşe b. Hamîd, Mustafa b. Mehmed, Perviz [b.] Abdullah, Yakub b. Kurd.