Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 318 Hüküm no: 384 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın bağını Yani v. Kiryazi’ye satması Vilâyet-i Rumeli’nde İnebahtı sancağında Gerbeniş kazâsına tâbi‘ Zağriyan? nâm karye sükkânından Mehmed Beşe b. Abdullah nâm râcil meclis-i şer‘-i hatîr-i lâzımü’t-tevkīrde işbu hâmilü’l-kitâb Yani v. Kiryazi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan Hüseyin Beşe b. Abdullah bağına ve bir tarafdan müşterî-i mezbûr bağına ve bir tarafdan Foti v. İskardo bağına ve bir tarafdan tarîk-i âma müntehî olan bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Yani’ye altı bin yedi yüz nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen eylediğimden sonra meblağ-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd mezkûr Yani’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Yani vicâhen tasdîk edicek mâ hüve’l-vâki‘ gıbbe’t-taleb ketb olundu. Şuhûdü’l-hâl: Fahrü’l-akrân Osman Bey b. Abdullah el-Cündî İbrahim Bey b. Abdullah el-Bevvâbü’s-sultânî, Hüseyin b. Abdullah er-Râcil, Mehmed Beşe b. Abd[ullah] er-Râcil ve gayruhüm mine’l-hâzırîn.