Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 319 Hüküm no: 386 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçıbaşı mahallesinden Emine’nin kendisini döven kocası Hamza b. Mehmed’den boşanmış olduğu Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Aşçıbaşı mahallesi sâkinelerinden Emine bt. ( ) nâm hâtun meclis-i şer‘-i hatîr-i lâzımü’t-tevkīrde zevci Hamza b. Mehmed nâm kimesneyi ihzâr ve mahzarında (…) [takrîr-i kelâm] edip bundan akdem zevcim merkūm Hamza bir dahi seni darb edersem benden talâk-ı selâse ile mutallaka ol deyû şart edip ba‘dehû inkâr ettikde ben dahi şuhûd-ı udûl ile isbât edip yedime hüccet dahi almış idim hâlâ şarta vefâ etmeyip beni yine darb eyledi. Binâen alâ zâlik merkūmdan talâk-ı selâse ile mutallaka oldum yine bana ta‘arruz etmek murâd eder husûs-ı mezbûr merkūmdan suâl olunup bi hasebi’ş-şer‘i’ş-şerîf lâzımı icrâ olunmak matlûbumdur dedikde gıbbe’s-suâl mezbûr Hamza cevâbında merkūmeyi darb eylediğini bi’l-külliyye inkâr edicek müdde‘iye-i mezbûreden sıdk-ı kelâmını mübeyyine beyyine taleb olundukda udûl-i müslimînden Mehmed b. Ali nâm kimesne ve Cemile bt. Abdullah ve Aynî bt. Hamza nâm hâtunlar li ecli’ş-şehâde meclis-i şer‘a hâzırûn olup gıbbe’l-istişhâdi’ş-şer‘î fi’l-vâki‘ merkūm Hamza mezbûre Emine’yi minvâl-i muharrer üzre darb eylediğine vech-i meşrûh üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde mezbûrûnun şehâdetleri hayyiz-i kabûl ve mahall-i irtizâda vâkı‘a oldukdan sonra mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’s-sâmin min Rebî‘ilevvel li sene tis‘a ve ışrîn ve elf. Şuhûdü’l-hâl: Mustafa b. Mehmed, Ali b. Abdullah, Perviz b. Abdullah, Yakub b. Kurd, Süleyman b. Turgud, Yusuf b. Abdullah. Müsveddede kalmağla bu mahalle kayd olundu.