Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 319 Hüküm no: 387 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemad v. Milo’ya Ramazan b. Abdullah’ın elinde bulunan kayıp kısrağının verilmesi Sürücü tâifesinden İstemad v. Milo nâm zimmî meclis-i şer‘-i hatîr-i lâzımü’t-tevkīrde Ramazan b. Abdullah nâm kimesneyi ihzâr ve mahzarında takrîr-i kelâm edip târih-i kitâbdan on gün mukaddem Havâss-ı Aliyye kazâsı müzâfâtından Terkos nâhiyesinde vâki‘ Kalkanderesi demekle ma‘rûf vâdide silk-i mülk-i sahîhimde münselik olan üç re’s bârgirim ve bir demir kır kısrağım mülkümden zâyi‘ olmuşidi hâlâ zikr olunan kısrağı mezbûr Ramazan yedinde buldum, suâl olunup bi hasebi’ş-şer‘-i’ş-şerîf lâzımı icrâ olunmak matlûbumdur dedikde gıbbe’s-suâl mezbûr Ramazan feth-i makāl edip cevâbında zikr olunan kısrağı Boğdan tâifesinden olup işbu gāibân ani’l-meclis olan Avram ve Kara nâm zimmîlerden bin üç yüz nakd-i fıddî-i Osmânî râyic fi’l-vakt akçeye iştirâ eyledim mezbûr İstemad’ın olduğu ma‘lûmum değildir deyû husûs-ı mezbûru bi’l-külliyye inkâr edicek müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Hasan b. Mustafa ve Mustafa b. Şaban nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ zikr olunan kısrak mezbûr İstemad’ın mülk-i mahzıdır bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri hayyiz-i kabûl ve mahall-i irtizâda vâkı‘a oldukdan sonra mezbûr İstemad mârrü’z-zikr kısrağı âhara bey‘ ve vücûh-ı şer‘iyyeden bir vechile mülkünden ihrâc etmeyip bu âna gelince mülkünde münselik olduğuna yemîn teklîf olundukda yemîn billâhi’llezî enzele’l-İncîle alâ İsa -aleyhi’s-selâm- etmeğin mârrü’z-zikr kısrağı mezbûr İstemad’a teslîme tenbîh birle işbu hurûf ber sebîli’t-temessük ketb olunup yed-i tâlibe def‘ ve vaz‘ olundu. Hurrire fi’l-yevmi’s-sânî aşer min Receb li târihi’l-mezbûr. Şuhûdü’l-hâl: Hasan Çavuş b. Mustafa, Hüseyin b. Hasan, Perviz b. Abdullah, Ali b. Abdullah, Süleyman b. Turgud, Yakub b. Kurd, Mustafa b. Mehmed.