Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 187 Hüküm no: 160 Orijinal metin no: [21a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Mihal’in kızına bakan Ralne bt. Komyoni’ye nafakasına karşılık incir bahçesini rehin verdiği Fi’l-asl cezîre-i Midilli’de Medîne-i Molova sâkinlerinden olup hâlâ mahmiye-i İstanbul’da Ayasofya kurbunda sâkin hayyât tâifesinden Panayot v. Mihal nâm zimmî meclis-i şer‘de yine Medîne-i mezbûre sâkinelerinden Ralne bt. Komyoni nâm nasrâniye tarafından husûs-ı âti’l-beyânı tasdîka vekîl olup Mehmed b. Süleyman ve Cafer b. Musli nâm kimesneler şehâdetleri ile şer‘an vekâleti sâbite olan Diyako v. Manoli nâm zimmî mahzarında ikrâr ve takrîr-i kelâm edip mezbûr Diyako’nun müvekkilesi mezbûre Ralne’nin hacr ve terbiyesinde olan sulbiye sagīre kızım Kanakazini’nin nafakası için bin yetmiş dört Ramazân’ı gurresinde taraf-ı şer‘den külle yevm farz ve takdîr olunan dört akçeden târih-i kitâba gelince müctemi‘ olan otuz bir buçuk esedî guruş deynimin on buçuk guruşunu vekîl-i mezbûr Diyako’ya def‘ ve teslîm edip bâkī yirmi bir guruş hâlâ edâya iktidârım olmamağla mukābelesinde Medîne-i mezbûre sınırı dâhilinde vâki‘ bir tarafdan tarîk-i hâs ve bir tarafdan Papuçcu oğlu mülkü ve bir tarafdan Duka nâm zimmî mülkü ve bir tarafdan âhar mülküm ile mahdûd bir kıt‘a mülk incir bahçemi târih-i kitâbdan yüz seksen gün tamâmına dek alâ tarîki’r-rehn zabta mezbûr Diyako’ya taslît eyledim, eğer meblağ-ı merkūm yirmi bir esedî guruşu varıp yüz seksen gün tamâmında edâ edemezsem mezbûr Diyako tarafımdan vekîl olup mârrü’z-zikr bahçeyi semen-i misli ile âhara bey‘ ve semeninden deynim olan yirmi bir guruşu müvekkil-i mezbûre Ralne’ye edâ edip ziyâdesin benim için hıfz eylesin dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Mustafa Çavuş el-Mübâşir, Abdi Çelebi b. Hüseyin, Şükrullah Bey b. Mustafa, Hasan Çelebi b. Ahmed, Baba Resul b. [Rıdvan].