Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 188 Hüküm no: 161 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Samur’un oğlu Dimitri’nin bostan kirasından Kara Mustafa Paşa Vakfı’na borçlu olduğu Merhûm vezîr-i a‘zam-ı sâbık Kara Mustafa Paşa vakfı’nın câbîsi ve vakf-ı mezbûrun bi’l-fi‘l mütevellîsi olan Ahmed Efendi b. ( ) nâm kimesne tarafından husûs-ı âti’z-zikre vekîl-i sâbitü’l-vekâlesi olan Mehmed Çelebi b. Hüseyin nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Kefeli mahallesinde sâkin iken bundan akdem hâlik olan Samur nâm zimmînin sulbî oğlu Dimitri nâm sagīrin vâlidesi ve tesviye-i umûruna kıbel-i şer‘-i mutahhardan mansûb vasîsi olan Marçoka bt. Pirako nâm nasrâniye muvâcehesinde üzerine da‘vâ ve takrîr-i kelâm edip vakf-ı mezbûr müstagallâtından olup mahalle-i mezbûrede vâki‘ icâreteyn-i ma‘lûmeteyn ile sagīr-i merkūmun tasarrufunda olan bostan icâresinden bin yetmiş altı senesi Rebî‘ulevvel’i gurresinden bin yetmiş yedi Safer’i gāyetine gelince sagīr-i mezbûrun zimmetinde müctemi‘ olan beş bin akçe ücretin mukaddemâ merkūm Marçoka yedinden beş yüz akçesini ahz u kabz edip dört bin beş yüz akçeyi dahi hâlâ vasiyy-i mezbûreden taleb ederim suâl olunsun dedikde gıbbe’s-suâl merkūm Marçoka fi’l-vâki‘ zikr olunan bostan ücretinden sagīr-i mezbûrun vakf-ı mezbûra dört bin beş yüz akçe deyni olduğunu bi tav‘ihâ ikrâr ve i‘tirâf etmeğin mûcebince meblağ-ı mezbûru mâl-i sagīr-i mezbûrdan müdde‘î-i merkūm Mehmed Çelebi’ye edâ ve teslîm mezbûre Marçoka’ya tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Cemâziyelevvel li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Baba Resul b. Rıdvan, Veli b. Mehmed.