Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 327 Hüküm no: 400 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın evini cariyesi Kamer bt. Abdullah’a hibe etmesi Medîne-i Ebâ Eyyûb-i Ensârî -râdiye anhu Rabbühü’l-Bârî- kurbunda Eğrikapı hâricinde vâki‘ merhûm el-Hâc Hüsrev mahallesi sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isetü’l-kitâb müdebberesi Kamer bt. Abdullah nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafı yine benim mülküm ve bir tarafı Mustafa Çelebi b. Hamza mülküne ve iki tarafı tarîk-i âma müntehî ve mahdûd olup bir fevkānî beyti ve bir tahtânî beyti ve bir müşterek su kuyusunu ve kenîfi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûre Kamer’e hibe-i sahîha-i şer‘iyye ile hibe ve temlîk ve teslîm eyleyip ol dahi minvâl-i muharrer üzre meclis-i hibede ittihâb ve kabz ve tesellüm eyledi ba‘de’l-yevm sâlifü’l-beyân menzil-i mahdûd mezkûre Kamer Hâtun’un mülk-i mevhûbudur keyfe mâ yeşâ ve yahtâr mutasarrıfe olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûre Kamer Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer li târihi’l-mezbûr. Şuhûdü’l-hâl: Ali Efendi b. Hasan el-İmâm bi’l-mahalleti’l-mezbûre, Maksud b. Ahmed, Mehmed b. Mustafa, Osman b. Abdullah, Ömer Bey b. Abdullah el-Bevvâbü’s-sultânî, Mehmed b. Ali el-Müezzin, Rıdvan Dede b. Abdullah, Şaban b. Hüseyin, Hızır b. Durmuş, Ali b. Abdullah.