Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 326 Hüküm no: 399 Orijinal metin no: [71b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varisomo bt. Dimitri’nin ev ve bağını Kika v. Duka’ya satıp tarlasının da tasarruf hakkını devretmesi Havâss-ı Aliyye kazâsı tevâbi‘inden Bendatise? nâm karye sâkinelerinden Varisomo bt. Dimitri nâm nasrâniye meclis-i şer‘-i hatîrde işbu hâmil-i hâze’l-kitâb Kika v. Duka nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Pavlo v. Pavli mülküne ve bir tarafdan Manol v. Nikola mülküne ve bir tarafdan Yorgo v. Nikola mülküne ve bir tarafdan müşterî-i mezbûr mülküne müntehî bir tahtânî ve bir fevkānî beyti ve bir ahırı ve bi’r-i mâyı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi ve yine karye-i merkūme sınırında vâki‘ bir tarafdan İstemad v. Yani bağına ve iki tarafdan mütevellî Sinan Efendi tarlasına ve bir tarafdan tarîk-i âma müntehî on iki dönüm bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile merkūm Kika’ya bi safkatin vâhidetin on iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eylediğimden sonra ve yine karye-i mezbûre sınırında mevâzi‘-i adîdede vâki‘ inde’l-ahâlî ma‘lûmü’l-hudûd cem‘an on iki kıt‘a tarla ki tahmînen cümlesi dört müd tohum istî‘âb eder mutasarrıfe olduğum tarlaların hakk-ı tasarruflarını sâhib-i arz ma‘rifetiyle mezbûr Kika’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde sekiz bin nakd-i [72a] [fıddî-i] Osmânî râyic fi’l-vakt akçeyi merkūm Kika yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân on iki kıt‘a taht-ı tasarrufumda olan tarlaların hakk-ı tasarrufları mersûmundur sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-merkūm Kika vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Recebi’l-ferd li sene tis‘a ve ışrîn ve elf. Şuhûdü’l-hâl: Fahrü’l-akrân Ali Ağa b. Abdülmennân el-Mütevellî-i Cafer Paşa, Ali b. Abdullah, Sinan Efendi el-Mütevellî, el-Hâc Sinan b. Abdullah ez-Za‘îmü’l-vakt bi karyeti mezbûre, Kosta v. Dimitri, Kirimo v. Papa, Todori v. Nikola.