Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 329 Hüküm no: 404 Orijinal metin no: [72b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Andriye’nin tarla tasarruf hakkını Kino v. Andriye’ye devretmesi Vilâyet-i Rumeli’nde Delvine kazâsına tâbi‘ Kostani nâm karye sâkinlerinden Kiro v. Andriye nâm zimmî meclis-i şer‘de işbu hâmilü’l-kitâb Kino v. Andriye nâm zimmî mahzarında bi’t-tav‘ ikrâr ve takrîr-i kelâm edip karye-i merkūme sınırı dâhilinde vâki‘ bir tarafdan Kiro v. Andriye tarlasına ve bir tarafdan Andriye [v.] Torgo tarlasına ve bir tarafdan cebele ve bir tarafdan tarîk-i âma müntehî ve yine karye-i merkūme sınırında vâki‘ bir tarafdan Baro v. ( ) tarlasına ve üç tarafdan cebele müntehî ve mahdûd bir kıt‘a cem‘an iki kıt‘a mutasarrıf olduğum tarlaların hakk-ı tasarrufunu sâhib-i arz ma‘rifetiyle merkūm Kino’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan sekiz bin nakd-i fıddî-i Osmânî râyic fi’l-vakt akçeyi merkūm Kino yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân iki kıt‘a tarlanın hakk-ı tasarrufu merkūm Kino’nundur, keyfe mâ yeşâ mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kino vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer li târihi’l-mezbûr. Şuhûdü’l-hâl: Toma v. Dimo, Kiro v. Dado, Dimo v. Şamo, Dimo v. Kini, Andriye v. Dimo, Nika v. Dimo, Kiryaki v. Koso, Tano v. Yaneka, Mitro v. Yani, Kiryaki v. Kini, Kini v. Andriye.