Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 330 Hüküm no: 405 Orijinal metin no: [72b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah b. Rüstem’in ev, bahçe ve bağını kardeşi Hasan Beşe’ye satıp tarlasının da tasarruf hakkı devretmesi Vilâyet-i Rumeli’nde Mora sancağında Kalavrita [kazâsına] tâbi‘ Kolkine? nâm karye mahallâtından Pirsendire mahallesi sükkânından Abdullah b. Rüstem nâm râcil meclis-i şer‘-i hatîr-i lâzımü’t-tevkīrde li ebeveyn karındaşı olan bâ‘isü’l-kitâb Hasan Beşe b. Rüstem mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede bir tarafdan Mehmed b. Ayaz mülküne ve bir tarafdan Dimo v. Yorgorili mülküne ve vâdiye ve bir tarafdan Yorgo v. Gavrili mülküne müntehî ve mahdûd iki tahtânî beyti müştemil mülk menzilden ve yine menzil-i mezbûra muttasıl ve mülâsık iki kıt‘a mülk bahçeden ve yine karye-i merkūme bağları sınırında her biri inde’l-ahâlî ve’l-cîrân ma‘lûmü’l-hudûd iki kıt‘a mülk bağları ve karye-i merkūmede mevâzi‘-i adîdede vâki‘ seksen dip dut eşcârından ve on dip kestane eşcârından hisse-i şâyi‘alarımı, cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin mezbûr Hasan Beşe’ye iki bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eylediğimden sonra yine karye-i merkūmede mevâzi‘-i müte‘addidede vâki‘ her biri inde ahâliyi’d-diyâr ma‘lûmü’l-hudûd ve’l-mikdâr sekiz kıt‘a tarladan hisse-i şâyi‘alarımın hakk-ı tasarrufunu sâhib-i arz ma‘rifetiyle mezbûr Hasan Beşe’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan sekiz yüz nakd-i fıddî-i Osmânî râyic fi’l-vakt akçeyi mezbûr Hasan Beşe yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘lerden hisse-i şâyi‘am mezbûr Hasan Beşe’nin mülk-i müşterâ-yı sarîhidir ve mârrü’z-zikr ma‘lûmü’l-aded tarladan dahi mutasarrıf olduğum hisse-i şâyi‘alarım mezbûr Hasan Beşe’nindir sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Hasan Beşe bi’l-muvâcehe tasdîk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-ışrîn min Recebi’l-ferd li’s-seneti’l-merkūme. Şuhûdü’l-hâl: Ahmed Beşe b. Abdullah er-Râcil, Cafer Beşe b. Abdullah er-Râcil, Ali b. Abdullah el-Muhzır, Muharrem Beşe b. Abdullah er-Râcil, Perviz b. Abdullah el-Muhzır.