Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 331 Hüküm no: 406 Orijinal metin no: [72b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Köni’nin ev ve bağını Kiro v. Martini’ye satması Vilâyet-i Rumeli’nde Delvine kazâsına tâbi‘ Muzine nâm karye sâkinlerinden Kiro v. Köni nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Kiro v. Martini nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Tara v. Kiryaki mülküne ve bir tarafdan Nikoş v. Dodo mülküne ve bir tarafdan ormana ve bir tarafdan tarîk-i âma müntehî ve mahdûd bir tahtânî beyti ve bir mikdâr bostan yerini ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve yine karye-i mezbûre bağları sınırında vâki‘ bir tarafdan Nikola v. Dimo bağına ve bir tarafdan ormana ve bir tarafdan Kiryaki v. ( ) bağına ve bir tarafdan tarîk-i âma müntehî tahmînen otuz çapalık bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Kiro’ya bi safkatin vâhidetin otuz bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler mezkûr Kiro’nun mülk-i müşterâ-yı sarîhidir [73a] keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Kiro bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin aşer min Recebi’l-ferd li sene tis‘a ve ışrîn ve elf. Şuhûdü’l-hâl: Durak b. Abdullah, Perviz b. Abdullah el-Muhzır, Ali b. Abdullah el-Muhzır, Mehmed b. Hasan, Kiro v. Dado, Tara v. Nika, İstatli v. Kika, İlya v. Hristo, Dimo v. Kiri, Nikola v. Kiro ve gayruhüm mine’l-hâzırîn.