Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 332 Hüküm no: 408 Orijinal metin no: [73a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nişâncı Paşa Evkâfı mütevellisinin vakfa ait hamamın yarısını Hüseyin b. Yusuf ve Zülfikar b. Hızır’a satması Medîne-i Ebâ Eyyûb el-Ensârî -râdiye anhu Rabbühü’l-Bârî-’de vâki‘ merhûm ve mağfûrun-leh Nişâncı Paşa evkāfına bi’l-fi‘l mütevellî olan Alâaddin Halîfe b. Hayreddin nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Hüseyin b. Yusuf ve Zülfikār b. Hızır nâm kimesneler mahzarlarında takrîr-i kelâm edip merhûm müşârün-ileyh hazretlerinin câmi‘-i şerîfleri ve ma‘bed-i latîfleri ve medîne-i merkūmede vâki‘ tûl-i zamânla vakıf odalar harâbe müşrif olup cânib-i vakıfdan dahi ta‘mîr ve termîme kifâyet edecek mal dahi olmamağın bir müddet dahi ihmâl olursa zikr olunan câmi‘-i şerîf ve odalar bi’l-külliyye harâb ve mâil ile’t-turâb olması mukarrer olmağın vâkıf-ı mûmâ-ileyh hazretlerinin yine medîne-i merkūmede vâki‘ bir kıt‘a vakıf hamamı dahi kezâlik harâb yirmi seneden mütecâviz hâlî ve mu‘attal olmağla bi’l-külliyye harâb ve mâil ile’t-turâb olmağın hamam-ı mezbûrun nısfını alâ tarîki’l-istibdâl ve’l-ibdâl füruht olunup zikr olunan câmi‘-i şerîfin ve odalarının ta‘mîr ve termîminden fazla kalan semen ile ağaç odalar binâ olduğu takdîrce her vechile vakfa evlâ ve ahrâ olduğu ba‘de’l-keşf ve’t-tahrîr cânib-i saltanat-ı aliyye ve südde-i seniyyeye arz olundukda zikr olunan hamamın nısfını alâ tarîki’l-istibdâl ve’l-ibdâl füruht olunup zikr olunan câmi‘-i şerîf ve odalar ta‘mîr ve termîminden fazla kalan odalar binâ olunmak bâbında emr-i celîlü’l-kadr vârid olmağın ben dahi tevliyyet-i mahkiyem hasebiyle hamam-ı mezbûrun nukzu ve kazganı câmi‘-i merkūmun ve odalarının ta‘mîr ve termîmine harc ve sarf ve mâ‘adâsıyla ağaç odalar dahi binâ etmek üzre ba‘de’n-nidâ ve’l-müzâyede fî sûk-ı sultânî ve inkıtâ‘-ı rağabâti’n-nâs merkūmân Hüseyin ve Zülfikār üzerlerinde otuz üç bin akçede karâr etmeğin meblağ-ı mezbûr otuz üç bin akçeye bey‘ edip kabz-ı semen ve teslîm-i mebî‘ eyledim dedikde mütevellî-i mezbûru ikrâr-ı meşrûhunda el-mukarru lehümü’l-mezbûrân Hüseyin ve Zülfikār vicâhen tasdîk edicek mâ hüve’l-vâki‘ bi’t-taleb ketb olundu. Hurrire fî evâsıtı Recebi’l-ferd li’s-seneti’l-merkūme. Şuhûdü’l-hâl: Mehmed Çavuş b. Bâli Kâtib-i dergâh-ı âlî, Bayram Efendi b. Şükrullah el-Hatîb bi câmi‘i Zal Paşa, mi‘mâr Musli Çelebi b. Hüsameddin el-Hatîb, Mehmed Bey b. Ahmed, Murad b. Abdullah, Ramazan b. Hüseyin, Osman b. Serhad, Mustafa b. Abdullah, Mustafa b. Mehmed, el-Hâc Mehmed Çavuş b. Mehmed Nâzır-ı kaldırım-ı pâdişâh-ı şehinşâh, Kasım Efendi b. Ahmed, Abdullah b. Mehmed Çavuş, Yakub b. Kurd ve gayruhüm mine’l-hâzırîn.