Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 333 Hüküm no: 409 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Mustafa’nın Arkalya kazâsındaki dut ağaçlarını İspilyot v. Dimitri’ye satması Vilâyet-i Rumeli’nde Mora sancağında nefs-i kazâ-i Fener sâkinlerinden İbrahim Bey b. Mustafa nâm cündî meclis-i şer‘-i hatîr-i lâzımü’t-tevkīrde işbu hâmilü’l-kitâb İspilyot v. Dimitri nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip yine Mora sancağında Arkalya kazâsına tâbi‘ Barçlı nâm karyede mevâzi‘-i adîdede vâki‘ silk-i mülkümde münselik olan on sekiz dip dut eşcârını cümle-i tevâbi‘ ve levâhıkı ile bi safkatin vâhidetin mezbûr İspilyot’a bin dört yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eyledim ba‘de’l-yevm sâlifü’l-beyân ma‘lûmü’l-aded on sekiz dip dut eşcârı mezbûr İspilyot’un mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr İspilyot bi’l-muvâcehe tasdîk edicek mâ hüve’l-vâki‘ alâ vukū‘ihî bi’t-taleb ketb olundu. Hurrire fi’l-yevmi’t-tâsi‘ aşer min Recebi’l-ferd li sene [tis‘a ve ışrîn ve elf]. Şuhûdü’l-hâl: Abdi Efendi b. ( ) el-Müderris, Ahmed Çelebi b. Demir el-Cündî Hüseyin Beşe b. İlyas er-Râcil, Selim Çelebi b. İsmail, Ali b. Abdullah, Perviz b. Abdullah el-Muhzır ve gayru[hüm mine’l-hâzırîn].