Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 335 Hüküm no: 411 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Abdülmennân’ın ev ve bağını Halil b. Yunus’a satıp tarlalarının da tasarruf hakkını devretmesi Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Kızıl Mescid mahallesi sâkinlerinden fahrü’l-akrân Ali Ağa b. Abdülmennân meclis-i şer‘-i hatîr-i lâzımü’t-tevkīrde işbu bâ‘isü’l-kitâb Halil b. Yunus nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Küçükhalkalı nâm karyede vâki‘ bir tarafdan Mustafa Bey nâm yesârî mülküne ve üç tarafdan tarîk-i âma müntehî [ve mah]dûd bir beyt-i süflîyi ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve yine karye-i merkūme bağları dâhilinde vâki‘ bir tarafdan Mirahor Mahmud Ağa bağına ve bir tarafdan İbrahim Çavuş tarlasına ve bir tarafdan Nurullah tarlasına ve bir tarafdan mezra‘a-i âti’l-beyâna ve bir tarafdan Dimitri nâm zimmî bağına müntehî bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Halil’e bi safkatin vâhidetin sekiz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eylediğimden sonra yine karye-i merkūme sınırı dâhilinde mevâzi‘-i adîdede vâki‘ lede’l-ahâlî ma‘lûmü’l-hudûd mutasarrıf olduğum dört kıt‘a tarlaların hakk-ı tasarrufunu sâhib-i arz ma‘rifetiyle merkūm Halil’e tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan bin nakd-i fıddî-i Osmânî râyic fi’l-vakt akçeyi merkūm Halil yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm Halil’in mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları mersûmundur dedikde mukırr-ı mezbûrun minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Halil vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî ve’l-ışrîn min Recebi’l-ferd li sene tis‘a ve ışrîn ve elf. Şuhûdü’l-hâl: Mustafa b. Abdullah, Rıdvan b. Abdullah er-Râcil, Cafer Beşe b. Abdullah er-Râcil, Mustafa b. Abdullah, Süleyman b. Abdullah, Keyvan b. Abdullah, el-Hâc Mustafa b. Sevindik, Mustafa b. Mehmed, Ali b. Abdullah, Perviz b. Abdullah ve gayruhüm.