Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 334 Hüküm no: 410 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maktûl Ergiri’nin terekesi olan koyunların satılarak Ebâ Eyyûb-i Ensârî Vakfı mütevellisine teslîmi Defter oldur ki Ergiri nâm zimmî çoban âhar tarafından maktûlen mürd olduğu tis‘a ve ışrîn ve elf şehr-i Rebî‘ulevvel evâsıtında zâhir oldukda terekesinden olan yüz yirmi üç re’s lâgar koyunları medîne-i Hazret-i Ebâ Eyyûb el-Ensârî’de Bâli Hâce mahallesinde Sivrisinek evleri kurbunda olan karlık eteğinde bulunup ma‘rifet-i şer‘ ve ehl-i vukūf üstâd-ı kasablar takdîr eylediği üzre geri tâife-i kasâbâna tevzî‘ olunup ve kıymetleri cem‘ ve tahsîl olunup eimme-i sulehâdan Hüsam Efendi nâm kimesneye kıbel-i şer‘-i şerîfden emânet vaz‘ olunmuş idi el-hâletü hâzihî hazret-i müşârün-ileyh evkāfına âid ve râci‘ olmağın mütevellîsi olan kıdvetü’l-emâcid ve’l-ekârim Ahmed Ağa ba‘de’l-ihrâcât ahz ve kabz eylediği alâ vukū‘ihî şerh ve kayd olundu. Tahrîren fi’l-yevmi’l-hâdî ve’l-ışrîn min Recebi’l-ferd li sene tis‘a ve ışrîn ve elf. An resm-i ağnâm-ı lâgar-ı mezkûrîn der yed-i İskender Beşe er-Râcil el-Kasab, Ağnâm 28 aded fî 63 1764 Def‘a ağnâm 28 aded fî 30 840 Yekûn ağnâm: 28 + 28 = 56 Kıymet: 1764 + 840 = 2604 An resm-i ağnâm-ı lâgar-ı mezkûrîn an yed-i Dimo v. Ligori zimmî kasab Ağnâm 39 aded fî 60 2340 Def‘a ağnâm 28 aded fî 30 840 Yekûn ağnâm: 39 + 28 = 67 Kıymet: 2340 + 840 = 3180 Cem‘an Ağnâm-ı lâgar: re’s: 56 + 67 = 122 [aded] Kıymet: 2604 + 3180 = 5783 [akçe] Minhâ Be cihet-i resm berâ-yı Hazret-i Efendi ma‘a ücret-i kademiyye ve gayruhû bi’d-defe‘ât 500 akçe Be cihet-i harc-ı defter ve kalemiyye ve harc-ı hücceteyn ve gayruhû 160 akçe Be cihet-i harc-ı mürde berâ-yı Hüsam Efendi ve gayruhû ma‘a ihtisâbiyye 100 akçe Be cihet-i müteferrika resm-i emîniyye ve dîdebâniyye: 300 akçe Yekûn-ı ihrâcât ber mûceb-i müfredât-ı mezkûrîn: 1060 akçe. El-bâkī ba‘de’l-ihrâcât makbûz-ı Ahmed Ağa mütevellî-i evkāfi’l-mezbûre: 4724 akçe. Meblağ-ı mezbûr yalnız dört bin yedi yüz yirmi dört akçedir.