Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 336 Hüküm no: 413 Orijinal metin no: [74a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed’in evini istiğlâl yoluyla Sinan Ağa Vakfı’na sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Çavuş Kasım mahallesinde sâkine olan Sâliha bt. Mehmed nâm hâtun âtiyyü’z-zikr menzilini merhûm Sinan Ağa vakfı’na mütevellî olan hâmil-i hâze’l-kitâb Receb Bey b. Süleyman’a bey‘ ettiğini ikrâr ve i‘tirâf etti. Mütevellî-i mezbûrda vakf-ı mezbûr malıyla ve istiğlâl maksadıyla mezbûre Sâliha hâtunun işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ bir tarafdan Ayşe Hâtun bt. Sinan mülkü, diğer tarafdan Kamer Hâtun bt. ( ) mülkü, öbür tarafdan Derviş Ali b. ( ) mülkü ve diğer tarafdan da tarîk-i âm ile mahdûd olan ve fevkānî ve tahtânî ikişer beyti, su kuyusunu, helâyı ve bahçeyi hâvî bulunan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe-i Osmânî semen-i mu‘ayyen-i makbûzla iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren bir sene tamâmına dört yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’r-râbi‘ ve’l-ışrîn min Recebi’l-ferd sene 1029. Şuhûdü’l-hâl: Ahmed Halîfe b. el-Müezzin, Hüsam Efendi b. Ali el-İmâm, Şeyh Musa b. Atâullah el-İmâm, Mahmud Bey b. Cemşid