Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 337 Hüküm no: 414 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koyun güderken yaralanan Nikola v. Piyo’nun ortağı Yani’den davacı olmaması Çoban tâifesinden Nikola v. Piyo nâm zimmî meclis-i şer‘-i hatîr-i lâzımü’t-tevkīrde Yani v. ( ) nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem vilâyet-i Rumeli’nde Çorlu kazâsına tâbi‘ kasaba-i Ergene kurbunda Karasekit[yiğit] nâm karye kurbunda mezbûr ile şerîkler olup koyun ra‘y ederken nısfü’l-leylde koyunumuzu birkaç nefer kimesne basıp ben dahi feryâd ve istigāse eyleyip figān eylediğimde içlerinden biri gözümden ve başımdan beni urup ziyâde mecrûh eyledi idi bu âna gelince husûs-ı mezbûrda senin ilmin [vardır] deyû şerîkim mezbûr Yani’yi mazanna ittihâz edip husûs-ı mezbûra müte‘allik mezbûr ile da‘vâ ve nizâ‘ üzre idim husûs-ı mezbûra müte‘allik cemî‘ da‘vâdan hasbeten lillâhi te‘âlâ fâriğ olup zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ [ve] nizâ‘ sudûr eder ise makbûle ve mesmû‘a olmaya dedikde mukırr-ı mezbûru ikrâr-ı meşrûhunda mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-tasdîk ketb olundu. Hurrire fi’l-yevmi’s-sâdis aşer min [Recebi’l-ferd] li’s-seneti’l-merkūme. Şuhûdü’l-hâl: Hasan Çavuş b. Abdullah, Hüseyin Ağa b. Abdullah müteferrika-i sultânî, Kenan Bey b. Abdullah Sarac-ı hâssa, Ali b. Abdullah el-Muhzır, Yuvan v. Tomyano, Nederko v. Petro, Yani v. İço, Şiro v. Mihal ve gayruhüm mine’l-hâzırîn.