Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 349 Hüküm no: 434 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Todori’nin kayıp İsteryano’daki alacağını kefîl olan Piyo v. Şiro’dan aldığı Dârü’s-saltanati’s-seniyye Kostantıniyye el-mahmiyye hısnı ebvâbından Samatyakapısı dâhilinde sâkin meyhâneci Andriye v. Todori nâm zimmî meclis-i şer‘de Piyo v. Şiro nâm zimmî muvâcehesinde da‘vâ edip bundan akdem işbu gāib ani’l-meclis olan İsteryano nâm zimmî zimmetinde karz-ı şer‘îden beş bin iki yüz elli akçem olup mezbûr Piyo emr [ve] kabûlü hâvî kefâletle kefîl olmuşdu el-hâletü hâzihî mezbûr İsteryano gāib olmağla meblağ-ı mezbûru kefâleti hasebiyle mezbûr Piyo’dan taleb ederim dedikde gıbbe’s-suâl akībe’l-inkâr beyyine taleb olundukda Yedikule kurbunda Mirahor mahallesi sâkinlerinden Petro v. Yani ve Zeytin mahallesi sâkinlerinden Mihal v. Yani nâm zimmîler li ecli’ş-şehâde hâzırân olup istişhâd olunduklarında fi’l-hakīka bundan akdem mezbûr Andriye merkūm İsteryano’dan meblağ-ı mezbûru bizim huzûrumuzda taleb ettikde ol hînde edâsından âciz olıcak mezbûr Piyo meblağ-ı mezbûra emr-i kabûlü hâvî kefâletle bizim huzûrumuzda kefîl olup bu husûsa minvâl-i meşrûh üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri hayyiz-i kabûlde vâkı‘a olup meblağ-ı mezbûr merkūm Piyo’dan hükm olundukdan sonra mezbûr Andriye hâzır bi’l-meclis olup merkūm Piyo’dan meblağ-ı mezbûru bi’t-tamâm ahz ve kabz eyledim zimmetinde bir akçe kalmadı dedikde gıbbe’t-tasdîk ketb olundu. Hurrire fî târihi’l-mezbûr. Şuhûdü’l-hâl: Yakub b. Kurd, Mustafa b. Mehmed, Perviz b. Abdullah, Ali b. Abdullah.