Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 349 Hüküm no: 433 Orijinal metin no: [77b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Pîr Ali Efendi’nin evi ile tarlaların tasarruf hakkını Allahverdi b. Kanber’e satması Oldur ki Havâss-ı Aliyye’ye tâbi‘ Pirvaliçe nâm karye sâkinelerinden Fâtıma Hâtun bt. Pîr Ali Efendi tarafından husûs-ı âti’l-beyânı ikrâra vekîl olup vekâleti merkūme Fâtıma Hâtun’u ma‘rifet-i şer‘iyye ile ârifân olan Osman Bey b. Abdullah el-Cündî ve Sami b. Mehmed şehâdetleri ile sâbite olan Mustafa Bey meclis-i şer‘de işbu hâfızü’l-kitâb Allahverdi b. Kanber muvâcehesinde ikrâr ve takrîr-i kelâm edip müvekkilem mezbûre Fâtıma Hâtun’un karye-i merkūmede vâki‘ bir tarafı Mehmed Çelebi nâm yesârî ve bir tarafı bâyi‘a-i merkūme ve bir tarafı Osman ve bir tarafı tarîk-i âm ile mahdûd olup üç bâb tahtânî beyti ve bir samanlık ve bir ahırı ve kenîfi ve bahçeyi ve havluyu ve eşcâr-ı müsmire ve gayr-ı müsmireyi müştemil olan mülk menzilini on bin akçeye bey‘ edip kabz-ı semen ve teslîm-i müsemmen ettikden sonra yine karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd olan on kıt‘a tarlasını dahi sâhib-i arz ma‘rifetiyle hakk-ı tasarrufunu tefvîz edip mukābele-i tefvîzde menfûz-ı mûmâ-ileyh yedinden beş bin nakid akçeyi tamâmen alıp kabz eyledi min ba‘d mârrü’z-zikr çiftlik-i mezbûr Allahverdi’nin mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Hurrire fî evâsıtı Ramazân li seneti’l-mezbûre. Şuhûdü’l-hâl: Ahmed b. Mehmed, Mehmed b. Abdullah, Yakub b. Kurd, Ali Beşe b. Abdullah, Şaban b. Yusuf.