Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 190 Hüküm no: 165 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe’nin ev alımından bedelini sahiplerine ödediğinin tespiti Mahmiye-i İstanbul’da Yenibahçe kurbunda Mi‘mâr Sinan mahallesi sâkinlerinden bâ‘isü’l-kitâb fahrü’l-eşbâh Hüseyin Beşe b. ( ) nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda mahalle-i mezbûre ahâlîsinden fahrü’l-akrân Hasan Çelebi b. Süleyman nâm kimesne ile ekāribinden Haçador ve Asvador veled[ey] Kestostor nâm zimmîler ve Mihrişah bt. Kestostor nâm nasrâniyenin zevci ve tarafından husûs-ı âti’l-beyâna vekîli olduğu mezbûrân Haçador ve Asvador şehâdetleriyle şer‘an sâbit olan Kosta v. Nikola nâm zimmîler mahzarlarında takrîr-i kelâm edip akd-i âti’z-zikrin sudûruna değin on sehimden beş sehm-i şâyi‘i mezbûr Hasan Çelebi’nin ve ikişer sehm-i şâyi‘i merkūmân Haçador ve Asvador’dan her birinin ve bir sehm-i şâyi‘i müvekkile-i mezbûre Mihrişah’ın mülkü olup mahalle-i mezbûrede vâki‘ bir tarafdan Mehmed Bey ve bir tarafdan Mahmud Çelebi ve bir tarafdan Süleyman Beşe nâm kimesneler mülkleri ve bir tarafdan tarîk-i âm ile mahdûd bir bâb fevkānî iki bâb tahtânî odalar ve bir ahır ve bir su kuyusu ve cüneyneyi müştemil menzilden mezbûr Hasan Çelebi hisse-i mezbûresini bana nakid râyic fi’l-vakt altı bin akçeye ve merkūmân Haçador ve Asvador’dan her biri dahi hisselerini ikişer bin dörder yüz akçeye ve müvekkile-i mezbûre Mihrişah dahi hisse-i mezbûresini bin iki yüz akçeye bey‘ ve teslîm ben dahi vech-i muharrer üzre iştirâ ve tesellüm edip semen-i mezbûr altı bin akçeyi mezbûr Hasan Çelebi’ye ve ikişer bin dörder yüz akçeyi dahi merkūmân Haçador ve Asvador’dan her birine ve bin iki yüz akçeyi dahi müvekkile-i mezbûre Mihrişah’a teslîm edip anlar dahi yedimden ahz u kabz ve tesellüm eylediler, suâl olunup takrîrleri tahrîr olunmak matlûbumdur dedikde, gıbbe’s-suâl mezbûr Hasan Çelebi menzil-i mezbûrdan hisse-i mezbûresini altı bin akçeye mezbûr Hüseyin Beşe’ye bey‘ ve teslîm ve kabz-ı semen eylediğini ve merkūmân Haçador ve Asvador’dan her biri menzil-i mezbûrdan hisse-i mezbûrelerini ikişer bin dörder yüz akçeye mezbûr Hüseyin Beşe’ye bey‘ ve teslîm ve kabz-ı semen ettiklerini ve vekîl-i mezbûr dahi müvekkilesi mezbûre Mihrişah menzil-i mezbûrdan hisse-i mezbûresini bin iki yüz akçeye mezbûr Hüseyin Beşe’ye bey‘ ve teslîm ve kabz-ı semen ettiğini ikrâr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Mehmed Efendi b. Ali el-İmâm, Hüseyin Çelebi b. Mehmed el-Müezzin, Ahmed Çelebi b. Mehmed el-Müezzin, Mehmed Çelebi b. Abdurrahman.