Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 190 Hüküm no: 164 Orijinal metin no: [21b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un don ve gömlek bahasından Rabia bt. Ali’den alacaklı olduğu Mahmiye-i İstanbul’da Burmalı Mescid mahallesi sâkinelerinden işbu bâ‘isetü’l-kitâb Fâtıma bt. Yusuf nâm hâtun meclis-i şer‘-i şerîf-i lâzımü’t-teşrîfde Râbia bt. Ali nâm hâtun mahzarında üzerine da‘vâ ve takrîr-i kelâm edip mezbûre Râbia zimmetinde yedimden müşterâ ve makbûz adedi beynimizde ma‘lûm don ve gömlek bahâsından üç bin yedi yüz akçe hakkım olup meblağ-ı mezbûrdan sekiz yüz elli akçesini mezbûre Râbia yedinden ahz u kabz edip meblağ-ı bâkī iki bin sekiz yüz elli akçe [22a] hakkım vardır hâlâ taleb ederim suâl olunup alıverilmesi matlûbumdur dedikde, gıbbe’s-suâl mezbûre Râbia cevâbında fi’l-vâki‘ müdde‘iyye-i mezbûreye iki bin sekiz yüz elli akçe zimmetimde vâcibü’l-edâ ve lâzımü’l-kazâ deynimdir deyû bi tav‘ihî ikrâr ve i‘tirâf etmeğin ikrârı mûcebince müdde‘iyye-i mezbûreye iki bin sekiz yüz elli akçeyi edâya merkūme Râbia’ya tenbîh birle mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Hüseyin Çavuş b. Ali, Şükrullah Bey b. Mustafa, Abdi Çelebi b. Hüseyin, Resul b. Rıdvan.