Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 357 Hüküm no: 448 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime’nin kocası Mustafa b. Hacı Ali’den muhâlaa yoluyla boşandığı için mehir alacağı olmadığı Medîne-i Hazret-i Ebâ Eyyûb-i Ensârî mahallâtından Yenimahalle sâkinelerinden Kerime bt. ( ) nâm hâtun meclis-i şer‘-i şerîfde zevci olan Mustafa b. Hacı Ali mahzarında takrîr-i da‘vâ edip zevcim mezbûr Mustafa beni tatlîk etmeğin zimmetinde olan mehr-i müeccelimden dört yüz akçe hakkımı mezbûrdan taleb ederim dedikde gıbbe’s-suâl mezbûr Mustafa cevâbında fi’l-vâki‘ merkūme Kerime benim zevcem ve menkûham olup lâkin mezbûre ile zikr olunan dört yüz akçe mehr-i müecceli ve nafaka-i iddeti üzerine muhâla‘a eyledik deyicek gıbbe’l-inkâr Cafer b. Abdullah ve Musa b. Abdullah nâm kimesneler meclis-i şer‘a li ecli’ş-şehâde hâzırân olup istişhâd olunduklarında fi’l-hakīka mezbûre Kerime dört yüz akçe mehr-i müeccelinden ve nafaka-i iddetinden fâriğa olup bizim huzûrumuzda muhâla‘a eylediler dedikde ketb olundu. Hurrire fî evâhiri Ramazân li târihi’l-mezbûr. Şuhûdü’l-hâl: Yakub b. Kurd, Mustafa b. Mehmed, Şaban b. Yusuf, Ali Beşe b. Abdullah.