Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 356 Hüküm no: 447 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Kaya’nın, başkasıyla evlenmesi üzerine yengesi Belkıs’dan yeğeni Mustafa’yı alması [Mahmiye-i Kostantıniyye] -humiyet ani’l-âfât ve’l-beliyye- mahallâtından Balat kurbunda vâki‘ Tahtaminâre mahallesi sâkinelerinden Fâtıma bt. Kaya nâm hâtun meclis-i şer‘-i hatîr-i lâzımü’t-tevkīrde Belkıs bt. Abdullah nâm hâtunu ihzâr ve mahzarında takrîr-i da‘vâ edip bundan akdem fevt olan li ebeveyn karındaşım Mustafa nâm kimesnenin mezbûre Belkıs’dan tevellüd eden Mustafa nâm sagīr-i bu âna gelince hakk-ı hidâne mezbûrenin olup hâlâ zevc-i âhara mezbûre Belkıs tezevvüc etmekle hakk-ı hidânesi sâkıt olup hakk-ı hidâne benim olmuşdur suâl olunup sagīr-i mezbûr mezbûreden bi hasebi’ş-şer‘i’ş-şerîf ahz olunup bana teslîm olunmasın taleb ederim dedikde gıbbe’s-suâl mezbûre Belkıs cevâbında nefsini zevc-i âhara tezvîc eylediğini mukır ve mu‘terife olmağın sagīr-i mezbûru mezbûre Fâtıma’ya teslîme merkūme Belkıs’a tenbîh birle mâ hüve’l-vâki‘ gıbbe’t-taleb ketb olundu. Hurrire fî evâhiri Şa‘bâni’l-mu‘azzam li târihi’l-mezbûr. Şuhûdü’l-hâl: Abdülhâdî Halîfe b. Hamdi el-İmâm, Osman b. Mustafa, Kasım Bey b. Abdullah, Hasan Bey b. Nasuh, Yusuf b. Abdullah, Perviz b. Abdullah, Yakub b. Kurd.