Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 359 Hüküm no: 453 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hasan’ın miras ev hissesini Hristatli v. Yorgi’ye satması Vilâyet-i Rumeli’nde Mora sancağında nefs-i Kartina mahallâtından Hasan Bey mahallesi sâkinlerinden Mehmed Beşe b. Hasan nâm râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Hristatli v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Dimitri v. ( ) mülküne ve bir tarafdan Bayram Hâce b. ( ) mülküne ve bir tarafdan Lütfi Bey b. Abdullah mülküne ve bir tarafdan tarîk-i âma müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî bostan yerini müştemil olan mülk menzilden babam merhûm-ı mezbûr Hasan’dan irs-i şer‘le bana intikāl eden hisse-i şâyi‘amı mezbûr Hristatli’ye bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûddan hisse-i şâyi‘am merkūm Hristatli’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Hristatli vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâmis min Şevvâli’l-mükerrem li sene 1029. Şuhûdü’l-hâl: Abdullah Efendi b. Mahmud el-Kadı, Hamdi Efendi b. Ali el-Kadı, Ahmed Efendi b. Mustafa el-Müderris, Abdullah Çelebi b. Hasan el-Mülâzım, Yusuf Çelebi b. Kasım el-Mülâzım, Mustafa Beşe b. Abdullah er-Râcil.