Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 359 Hüküm no: 454 Orijinal metin no: [79b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram b. Abdullah’ın kayıp Karakaş’daki alacağını kefîli olan Hüseyin b. Kemal’den talep etmesi Medîne-i Ebâ Eyyûb-i Ensâri -râdiye anhu Rabbühü’l-Bârî- mahallâtından ( ) mahallesi sâkinlerinden Bayram b. Abdullah nâm kimesne meclis-i şer‘-i şerîfde Hüseyin b. Kemal mahzarında da‘vâ ve takrîr-i kelâm edip mezbûr Hüseyin işbu gāib ani’l-meclis olan Ermeni tâifesinden Karakaş nâm bir Ermeni’ye bundan akdem kırk bir sikkeyi Hüseyin’e verdiğimde mezbûr Hüseyin emr [ve] kabûlü hâvî kefâletle kefîl bi’l-mâl olmuşidi hâlâ mezbûr Karakaş gāib olmağla merkūm Hüseyin’den kefâleti hasebiyle taleb ederim dedikde gıbbe’s-suâl akībe’l-inkâr, müdde‘î-i mezbûrdan sıdk-ı makāline mutâbık beyyine taleb olundukda udûl-i ricâlden Nebi b. ( ) ve Hasan b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Bayram merkūm Karakaş’a meblağ-ı mezbûru verdikde merkūm Hüseyin bizim huzûrumuzda emr [ve] kabûlü hâvî kefâletle kefîl bi’l-mâl olmuşdur biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olup mâ hüve’l-vâki‘ bi’t-taleb ketb olundu. Hurrire fî evâhiri Ramazâni’l-mübârek li târihi’l-mezbûr. Şuhûdü’l-hâl: Ahmed b. Abdullah, Alâaddin Halîfe b. Osman, Ali b. Maden ve gayruhüm mine’l-hâzırîn.