Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 363 Hüküm no: 461 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miyo v. Viyo’nun ev, bağ ve harman yerini Liko v. Minho’ya satıp tarlasının da tasarruf hakkını devretmesi Vilâyet-i Rumeli’nde Avlonya sancağında Arnavud Belgradı kazâsına tâbi‘ Kamaçişte nâm karye sâkinlerinden Miyo v. Viyo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Liko v. Minho nâm zimmî mahzarında ikrâr ve takrîr-i kelâm edip karye-i merkūmede vâki‘ bir tarafdan Hristo v. Koço mülküne ve bir tarafdan Mano v. Marto mülküne ve bir tarafdan Yani v. Pirlo mülküne ve bir tarafdan tarîk-i âma müntehî bir tahtânî beyti ve cüneyneyi müştemil olan mülk menzilimi ve yine menzil-i mezbûra muttasıl tahmînen on çapalık bir kıt‘a mülk bağımı ve harman yerimi cümle-i tevâbi‘ ve levâhıkı ile bi safkatin vâhidetin merkūm Liko’ya üç bin beş yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eylediğimden sonra yine menzil-i mezbûr kurbunda vâki‘ tahmînen on dönüm bir kıt‘a mutasarrıf olduğum tarlanın dahi hakk-ı tasarrufunu sâhib-i arz ma‘rifetiyle merkūm Liko’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin beş yüz nakd-i mezbûrü’n-na‘t akçeyi merkūm Liko yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân emlâk-i merkūm Liko’nın mülk-i müşterâ-yı sarîhidir ve mârrü’z-zikr tarlanın dahi hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Liko bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 7 min Şevvâli’l-mükerrem li târihi’l-mezbûr. Şuhûdü’l-hâl: Nikola v. Piro, Nikola v. Nika, Rika v. Piye, Kara Nika, Dimitri b. Nika, Komini v. Andriye, Vasil v. Minho, Niko v. Marko.