Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 364 Hüküm no: 462 Orijinal metin no: [80b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mato v. Royo’nun ev ve bağının yarısını Niko v. Todori’ye satıp tarlalarının da tasarruf hakkının yarısını devretmesi Vilâyet-i Rumeli’nde Avlonya sancağında Arnavud Belgradı kazâsına tâbi‘ Pahtalı nâm karye sâkinlerinden Mato v. Royo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Niko v. Todori nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Mozo v. Bito mülküne ve bir tarafdan Dimo v. Dibe mülküne ve bir tarafdan Manol v. Piye mülküne ve bir tarafdan Nikola v. Dimitri mülküne müntehî ve mahdûd mülk menzilimin nısfını ve yine menzil-i mezbûr kurbunda vâki‘ tahmînen beş dönüm bir kıt‘a mülk bağımın nısfını merkūm Niko’ya bi safkatin vâhidetin iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezbûrânı mahallinde kabza müşterî-i merkūmu taslît eylediğimden sonra yine karye-i merkūme sınırında mevâzi‘-i adîdede vâki‘ her biri lede’l-ahâlî ve’l-cîrân ma‘lûmü’l-hudûd on kıt‘a mutasarrıf olduğum tarlaların dahi nısfının hakk-ı tasarrufunu sâhib-i arz ma‘rifetiyle merkūm Niko’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin nakd-i mezbûrü’n-na‘t akçeyi merkūm Niko yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘lerin nısfı merkūm Niko’nun mülk-i müşterâ-yı sarîhidir ve mârrü’z-zikr tarlaların dahi nısfının hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Niko bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’t-târihi’l-mezbûr. Şuhûdü’l-hâl: es-Sâbıkūn.