Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 192 Hüküm no: 167 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın, Mehmed b. Hüseyin’den muhâlaa yoluyla boşandığı Mahmiye-i İstanbul hısnı ebvâbından Ayakapısı dâhilinde Mustafa Paşa mahallesi sâkinelerinden Âişe bt. Mustafa nâm hâtun meclis-i şer‘-i şerîf-i lâzımü’t-teşrîfde zevc-i dâhilün-bihâsı işbu bâ‘isü’l-kitâb Mehmed b. Hüseyin mahzarında ikrâr ve takrîr-i kelâm edip zevcim mezbûr Mehmed zimmetinde cihet-i karz-ı şer‘îden olan beş yüz akçe hakkımı mezbûr Mehmed yedinden ahz u kabz eylediğimden sonra zevcim mezbûr Mehmed zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka-i iddetim üzerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledikden sonra zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Ahmed Beşe b. Mehmed, Receb b. Mustafa, Mehmed b. Süleyman, Hasan Çelebi b. Ahmed, İbrahim Çelebi.