Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 366 Hüküm no: 465 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâslar, Vize ve Pınarhisar bölgesinde eşkıyalıkların önlenmesi fermanı Efâzılü’l-kuzâti’l-müslimîn evâli’l-vülâti’l-muvahhidîn me‘âdinü’l-fezâil ve’l-yakīn hüccetü’l-hakkı ale’l-halkı ecma‘în vârisü ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Hâslar kazâsı ve sâbıkan ( ) kadısı olup hâlâ Vize kazâsına mutasarrıf olan ( ) ve sâbıkan kadısı olup ber vech-i arpalık Pınarhisar kazâsına mutasarrıf olan -zîdet fazluhüm- ve mefâhirü’l-emâsil ve’l-akrân zikr olunan kadılıklarda olan yeniçeri zâbitleri ve bölük halkı -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki hâliyâ mahrûse-i İstanbul kasabları akçe ile Rumeli vilâyetine giderler iken taht-ı kazânızdan ba‘zı levendân ve çoban ve sâir eşkıyâ ve ehl-i fesâd zuhûr edip İstanbul kasablarından nicesi katl ve yanlarında koyun için alıp gitdikleri akçeyi ve at ve esbâbları gāret ve hasâret ve küllî fesâd ve şenâ‘at eyledikleri i‘lâm olunmağın bu bâbda sizin adem-i tekayyüdünüzden fehm olunmağla mes’ûl olmuşuzdur imdi o makūle eşkıyâ ve ehl-i fesâd hafiyyeten ve alâniyeten tefahhus olunup zuhûra getirilmek mühimmât-ı dîn ve devletden olmağla sâbıkan Edirne’de bostancıbaşı olan Sinan ve Aşağı bölük kethüdâlarından ( ) -zîde mecdühümâ- ve yeniçeri çavuşlarından ( ) -zîde kadruhû- ta‘yîn olunup ol cânibe irsâl olunmuşlardır bu bâbda her biriniz bi’z-zât mukayyed olup ve ol tarafda derbendler muhâfazasına me’mûr olan derbendçilere süzdürülüp eşkıyâ her ne tarîkle ele getirilmesi mümkün ise bi eyyi vechin kâne mezbûrlar mübâşeretleriyle hüsn-i tedbîr ve tedârükle ele getirilip ol makūle katl-i nüfûs ve gāret-i emvâl edenlerin haklarından gelinmek bâbında fermân-ı âlîşânım sâdır olmuşdur buyurdum ki ( ) vusûl buldukda bu bâbda sâdır olan emrim üzre amel edip dahi her biriniz bi’z-zât mukayyed olup taht-ı kazânızda ol makūle kasabları ve ebnâ-i sebîli katl edip fesâd edenler kimlerdir hafiyyeten ve alâniyeten ahâlî-i vilâyetden tecessüs ve tefahhus edip ve mazanna ve müttehem olanlardan dahi suâl olunup derbendçilere derbendleri süzdürüp her ne tarîkle olursa olsun beher hâl mezbûrlar mübâşeretleri ile ele getirilip fesâd ve şenâ‘atleri üzerlerine sâbit oldukdan sonra muhtâc-ı arz olmayanları şer‘le haklarından gelip ve muhtâc-ı arz olanları bölük kethüdâsına ve yeniçeri çavuşuna teslîm ve üzerlerine sâbit olan mevâddın sûret-i sicilleriyle südde-i sa‘âdetime gönderesiz ve bi’l-cümle husûs-ı mezbûr mühimmât-ı umûr-ı dîndir siz ki kadılarsız bu bâbda her biriniz gereği gibi mukayyed olup mezbûrlara mu‘âvenet edip beher hâl ol makūle eşkıyâyı ele getirmekde ikdâm ve ihtimâm eyleyesiz ve siz ki zikr olunan kazâlarda sâkin bölük halkı ve yeniçeri tâifesiz bu bâbda siz dahi mezbûrlara gereği gibi mu‘âvenet edip ol makūle eşkıyâyı ele getirmekde her biriniz bezl-i makdûr eyleyesiz ve husûs-ı mezbûra me’mûr olanlarsız şöyle ki ahz ve celb sebebi ile eşkıyâya himâyet etmekde ele getirmekde ihmâl eylemeyesiz anlara olan hakāret size olur ana göre basîret üzre olasız ammâ bu bahâne ile eşkıyâdan olmayıp kendi hâllerinde olanlara dahl ve hilâf-ı şer‘ zulm [ve] ta‘addîden ihtirâz eyleyesiz şöyle bilesiz alâmet-i şerîfe i‘timâd kılasız. Tahrîren fî evâsıtı şehri Ramazâni’l-mübârek li sene tis‘a ve ışrîn ve elf. Be makām-ı Kostantıniyye el-mahrûse.