Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 365 Hüküm no: 464 Orijinal metin no: [81a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun’a intikal eden çiftliğe başkasının müdahale etmemesine dair ferman sureti Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halkı ecma‘în vârisü’l-enbiyâi ve’l-mürselîn el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki Emine nâm hâtun Dergâh-ı mu‘allâ[ya] şöyle arz-ı hâl eyledi ki kazâ-i mezbûra tâbi‘ Sırtgökçeli nâm karye sâkinlerinden olup halası olan Hatice nâm hâtun fevt olup çiftliği buna intikāl eylemiş iken âhardan Ali nâm kimesne zikr olunan çiftliğin bir mikdâr yerin bunun haberi yoğiken hafiyyeten mütevellîden alıp dahl eylediğin bildirip men‘ ve def‘ olunmak recâ etmeğin buyurdum ki ( ) vusûl buldukda arz olunduğu gibi karye-i mezbûrda vâki‘ olan halası fevt oldukda çiftliği irs-i şer‘le buna intikāl eyleyip bu çiftlik yerlerin mütevellîden tapu ile almağa tâlibe iken âhardan Ali hafiyyeten ol vechile alıp tasarrufuna mâni‘ olduğu vâki‘ ise câiz değildir men‘ ve def‘ edip zikr olunan çiftliği ve yerleri buna zabt ve tasarruf ettirip min ba‘d mezbûr Ali’yi ve âhardan bir ferdi dahl ve ta‘arruz ettirmeyesin inâd ve muhâlefet edeni yazıp i‘lâm eyleyesin min ba‘d mezbûr yere bu tâlibe iken zikr olunan yerleri dahl ettirmeyip buna tasarruf ettiresin şöyle bilesin alâmet-i şerîfe i‘timâd kılasın. Tahrîren fî evâsıtı şehri Şa‘bâni’l-mu‘azzam li sene 1029. Be makām-ı Kostantıniyye el-mahrûse.