Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 367 Hüküm no: 467 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Süleyman’ın timarına başkasının müdahale ettirilmemesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı [ale’l-halkı ecma‘în vârisü] ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în mevlânâ Hâslar kadısı -[zîdet] fezâilühû- tevkī‘-i refî‘-i hümâyûn vâsıl olıcak ma‘lûm ola ki Dîvân-ı hümâyûnum kâtiblerinden (…) fermân-ı vâcibü’l-iz‘ân kıdvetü erbâbi’t-tahrîr ve’l-kalem umdetü ashâbi’t-takrîr ve’r-rakam kâtib Süleyman Efendi südde-i sa‘âdetime gelip Vize sancağında Çorlu nâhiyesinde Eskiereğli ve Balabanlı ve Apa nâm karye ve gayrıdan iki bin yedi yüz akçe hisse timar Musli ve Ali Çavuş tahvîllerinden kendiye tevcîh olunup elinde olan temessükâtı mûcebince zabt ve tasarruf ettirilip âhardan bir ferdi dahl ettiril[me]mek bâbında inâyet recâ etmeğin elinde olan temessükâtı mûcebince kemâ-kân zabt ve tasarruf ettirilmek fermânım olmuşdur buyurdum ki emr-i celîlü’l-kadrim üzre timar-ı mezbûru mezkûr kâtib Süleyman’ın elinde olan temessükâtı mûcebince kemâ-kân zabt ve tasarruf ettirip min ba‘d âhardan bir ferdi dahl ve ta‘arruz ettirmeyesiz dahl edip tahvîl ve târihine düşen hukūk ve rüsûmundan kimesne nesnesini dahi almışlar ise ba‘de’s-sübût hükm edip bî-kusûr alıveresiz alâmet-i şerîfe i‘timâd kılasız. Tahrîren fî evâili şehri Şevvâli’l-mükerrem li sene tis‘a ve ışrîn ve elf. Be makām-ı Kostantıniyye el-mahrûse.