Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 372 Hüküm no: 474 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın ev hissesini ve tarlalarının tasarruf hakkını kardeşi İstemo v. Yani’ye devretmesi Vilâyet-i Rumeli’nde Yanya kazâsına tâbi‘ İnanlı nâm karye sâkinlerinden Mehmed b. Abdullah nâm (...) işbu hâmilü’l-kitâb li ebeveyn karındaşı İstamo v. Yani muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûrede vâki‘ bir tarafdan Minho v. Yani mülküne ve iki tarafdan İstefo v. Yani mülküne ve bir tarafdan tarîk-i âma (…) müntehî bir beyt-i süflîyi ve kerm ve cüneyneyi muhtevî karındaşım mezbûr İstamo ile ale’l-iştirâki’s-seviy mutasarrıf olduğumuz mülk menzilden nısf hisse-i şer‘iyye-i şâyi‘amı cümle-i tevâbi‘ ve levâhıkı ve âmme-i menâfi‘ ve merâfıkı ile merkūm İstamo’ya bin beş yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd diyârımız keyli ile tahmînen sekiz keyl tohum istî‘âb eder dört kıt‘a tarlanın hakk-ı tasarrufunu dahi sâhib-i arz ma‘rifetiyle mezbûra tefvîz edip ol dahi tefevvüz ve kabûl ettikden sonra mukābele-i tefvîzde olan beş yüz nakd-i mezbûrü’n-na‘t akçeyi mersûm İstamo yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzilden nısf hisse-i şâyi‘a mezkûr İstamo’nun mülk-i sarîhidir ve mârrü’z-zikr dört kıt‘a tarla dahi merkūmundur, sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr İstamo bi’l-muvâcehe tasdîk [edicek mâ hüve’l-vâki‘ bi’t-taleb ketb olundu]. Fi’t-târihi’l-mezbûr. Şuhûdü’l-hâl: Mustafa [b.] Mehmed, Yakub [b.] Kurd, Perviz b. Abdullah, Ali b. Abdullah, Kiryaki [v.] Yani, Nikola [v.] Verte, Dimo [v.] Niko, Yani [v.] İstefo, Yani [v.] Verte.