Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 394 Hüküm no: 514 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Piyâle’nin bağını Nikola v. Yani’ye satması Livâ-i Mora’da Trapoliçe kazâsına tâbi‘ Maniş nâm karye sâkinlerinden fahrü’l-emâsil ve’l-a‘yân Hüseyin Ağa b. Piyâle mahfil-i kazâda işbu râfi‘ü’l-kitâb Nikola v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip kasaba-i Trapoliçe bağları dâhilinde vâki‘ bir tarafdan Haroni v. ( ) bağına ve bir tarafdan Kiryako v. ( ) bağına ve bir tarafdan Yani Kazancani bağına ve bir tarafdan Yani Hoya bağına müntehî tahmînen dört dönüm bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile merkūm Nikola’ya sekiz bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i mezbûru taslît eyledim ba‘de’l-yevm zikr olunan bir kıt‘a bağ mezkûr Nikola’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Nikola bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî evâhiri Şevvâli’l-mükerrem li sene tis‘a ve ışrîn ve elf. Şuhûdü’l-hâl: Mehmed Çavuş b. Hürrem, Ali Çavuş b. Hüseyin, Mustafa Çavuş b. Süleyman, Derviş Çavuş b. ( ), Ali Çelebi b. Beşir ve gayruhüm mine’l-hâzırîn.