Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 395 Hüküm no: 515 Orijinal metin no: [87a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yano v. Piyo’nun ev, ev eşyası, şırahane ve bağlarını Mato v. Minho’ya satması Vilâyet-i Rumeli’nde Avlonya sancağında Arnavud Belgradı kazâsına tâbi‘ Biyaşova nâm karyeden Yano v. Piyo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mato v. Minho nâm zimmî mahzarında ikrâr edip karye-i merkūmede vâki‘ bir tarafdan Minho v. Piyo mülküne ve bir tarafdan Pito v. Todori mülküne ve bir tarafdan Papa Veri mülküne ve bir tarafdan Petro v. Piye mülküne müntehî ve mahdûd bir tahtânî beyti ve şırahâneyi ve şırahânede olan üç aded şirâ fıçısını ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilden nısfını ve beynimizde ilm-i şer‘î ile ma‘lûm esâs-ı beytden ve yine menzil-i mezbûra muttasıl ve mülâsık tahmînen on dönüm iki kıt‘a mülk bağlarımın nısfını cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin mezbûr Mato’ya üç bin nakd-i fıddî-i Osmânî râyic fi’l-vakt akçeye bey‘-i bât ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde mevâzi‘-i adîdede vâki‘ her biri lede’l-ahâlî ve’l-cîrân ma‘lûmü’l-hudûd ve’l-mikdâr mutasarrıf olduğum on kıt‘a tarlaların dahi nısfının hakk-ı tasarrufunu sâhib-i arz ma‘rifetiyle merkūm Mato’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin nakd-i mezbûrü’n-na‘t akçeyi merkūm Mato yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘lerin nısfı merkūm Mato’nun mülk-i müşterâ-yı sarîhidir ve mârrü’z-zikr tarlaların dahi nısfının hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde gıbbe’t-tasdîk ketb olundu. Hurrire li târihi’l-mezbûr. Şuhûdü’l-hâl: Mustafa b. Abdullah, Hasan b. Abdullah, Hasan b. Sinan, Ali b. Hasan ve gayruhüm mine’l-hâzırîn.