Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 399 Hüküm no: 520 Orijinal metin no: [88a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yani’nin ev ve bağını Mihal v. Andon’a satıp tarlaların da tasarruf hakkını devretmesi Mora sancağında nefs-i kasaba-i Trapoliçe mahallâtından Debbâğ mahallesi sâkinlerinden Nikola v. Yani nâm zimmî meclis-i şer‘de hâmilü’l-kitâb Mihal v. Andon nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Panayot v. Kiri mülküne ve bir tarafdan Nikola v. Andon mülküne ve bir tarafdan Nikola v. Cenkal mülküne ve bir tarafdan tarîk-i âma müntehî bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilimi ve yine kasaba-i merkūme bağları dâhilinde vâki‘ bir tarafdan Nikola v. Pavliyot bağına ve bir tarafdan Kiryako v. İstemad bağına ve bir tarafdan Mihal v. Pavliyot bağına ve bir tarafdan tarîk-i âma müntehî tahmînen on beş dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin bin beş yüz nakd-i fıddî-i Osmânî râyic fi’l-vakt akçeye mezbûr Mihal’e bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eylediğimden sonra yine kasaba-i merkūme kurbunda her biri lede’l-ahâlî ma‘lûmü’l-hudûd tahmînen diyârımız keyli ile otuz keyl tohum istî‘âb eder mutasarrıf olduğum iki kıt‘a tarlanın hakk-ı tasarrufunu sâhib-i arz ma‘rifetiyle merkūm Mihal’e tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan beş yüz nakd-i mezbûrü’n-na‘t akçeyi merkūm Mihal yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm Mihal’in mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları merkūmundur, keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Mihal bi’l-muvâcehe tasdîk ve bi’l-müşâfehe tahkīk edicek bimâ hüve’l-vâki‘ gıbbe’t-taleb ketb olundu. Hurrire fî 7 min Zilka‘deti’ş-şerîfe li târihi’l-mezbûr. Şuhûdü’l-hâl: Yani v. Mijotro, Anganosti v. Jivet, Kiryako v. Jotac, Papa v. Vinliyot, Polihroni v. Kakalot, Todori v. Şilimyot ve gayruhüm mine’l-hâzırîn.