Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 398 Hüküm no: 519 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nuhur Kostrova köylülerinin ortak oldukları yurt yeri ve yoncalığı Dimo v. Pavlo’ya satıp tarlalarının da tasarruf haklarını devretmeleri Vilâyet-i Rumeli’nde İnebahtı sancağında Çatalca kazâsına tâbi‘ Nuhur Kostrova nâm karye ahâlîsinden Yorgi v. Yani ve Yani v. Mihal ve Şiro v. Yorgi ve Pavlo v. Nikola ve Yorgi v. Yani ve Mihal v. Yani ve Dimo v. Yorgi ve Ergiri v. Varto nâm zimmîler ve sâirleri cemm-i gafîr ve cem‘-i kesîr meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Dimo v. Pavlo nâm zimmî mahzarında her biri ikrâr edip karye-i merkūmede vâki‘ iki tarafdan müşterî-i mezbûr Dimo mülküne ve iki tarafdan tarîk-i âma müntehî ale’l-iştirâki’s-seviy mülkümüz olan harâbe yurd yerini ve yine karye-i merkūmede vâki‘ lede’l-ahâlî ma‘lûmü’l-hudûd bir kıt‘a yoncalığı cümle-i tevâbi‘ ve levâhıkı ile bi safkatin vâhidetin mezbûr Dimo’ya dört bin nakid akçeye bâtten bey‘ ve kabz-ı semen edip mebî‘ân-ı mezkûrânı mahallinde kabza müşterî-i mezbûru taslît eylediğimizden sonra yine karye-i merkūme sınırı dâhilinde vâki‘ her biri lede’l-ahâlî ma‘lûmü’l-hudûd ale’l-iştirâki’s-seviy mutasarrıf olduğumuz üç kıt‘a tarlanın dahi hakk-ı tasarrufunu sâhib-i arz ma‘rifetiyle merkūm Dimo’ya tefvîz edip ol dahi minvâl-i muharrer tefevvüz ve kabûl eylediğinden sonra mukābele-i tefvîzde olan iki bin nakd-i mezbûrü’n-na‘t akçeyi mezbûr Dimo yedinden bi’t-tamâm ale’l-iştirâk ahz ve kabz eyledik ba‘de’l-yevm sâlifü’l-beyân mebî‘ler merkūm Dimo’nun mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu merkūmundur, sâir emsâli tasarrufu gibi keyfe mâ yeşâ mutasarrıf olsun dediklerinde mukırrûn-ı mezbûrûnun ikrârlarını el-mukarru lehü’l-mezbûr Dimo bi’l-muvâcehe tasdîk edicek ketb olundu. Hurrire li târihi’l-mezbûr. Şuhûdü’l-hâl: Yani v. Şiro, Polomi v. Dimo, Yani v. Todori, Franko v. Todori, Yorgi v. Yani, Dimo v. Yani, Hristo v. Rizo, Minho v. Dimo.