Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 195 Hüküm no: 173 Orijinal metin no: [22b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Veli Efendi b. Osman’ın terekesi hususunda vârisleri arasında sulh olduğu Mahmiye-i İstanbul’da Uzun Yusuf mahallesinde sâkin iken bundan akdem vefât eden Veli Efendi b. Osman’ın verâseti zevce-i metrûkesi Ümmühâni bt. Mehmed nâm hâtun ile sulbiye kebîre kızı Âlime’ye ve oğlu Abdullah b. Mustafa’ya münhasıra olduğu şer‘an zâhir oldukdan sonra merkūm Abdullah meclis-i şer‘de muhallefât-ı mezbûra vâzı‘atü’l-yed olan zevcesi merkūme Ümmühâni’nin tarafından husûs-ı âti’l-beyâna vekîl-i müsecceli olan Mehmed Efendi b. el-Hâc Ahmed nâm kimesne mahzarında ikrâr ve takrîr-i kelâm edip mûrisim müteveffâ-yı mezbûr Veli Efendi’nin terekesinden bana isâbet eden hisse-i şer‘iyyem mukābelesinde şerâit-i sulhü hâvî mevâni‘-i müfsideden ârî tehârüc-i şer‘î üzre vesâtat-ı müslimîn ile nakid râyic fi’l-vakt yedi bin iki yüz akçe üzerine müvekkile-i merkūme ile inşâ-i akd-i sulh ettiklerinde, ben dahi sulh-i mezbûru kabûl ve bedel-i sulh-i meblağ-ı mezbûru müvekkile-i merkūme yedinden tamâmen ahz u kabz edip tereke-i müteveffâ-yı mezbûra ve müteveffâ-yı mezbûr zimmetinde cihet-i deyn-i [23a] şer‘îden yüz otuz esedî guruş hakkım vardır deyû bundan akdem terekesine vâzı‘atü’l-yed olan müvekkile-i merkūme Ümmühâni’den da‘vâ sadedinde olmuşidim el-hâletü hâzihî ol da‘vâmdan dahi müvekkile-i mezbûrenin zimmetini ibrâ-i âmm-ı kātı‘ü’n-nizâ‘ [ile] ibrâ ve iskāt eyledim min ba‘d gerek tereke-i müteveffâ-yı mezbûra ve gerek ol meblağa müte‘allika müvekkile-i mezbûre ile da‘vâ ve nizâ‘ım ve alâka ve medhalim kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Hasan Çelebi b. Ahmed, Süleyman Çelebi b. Receb, İbrahim Çelebi b. Mehmed, Resul b. Rıdvan, Mehmed b. Ramazan.