Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 196 Hüküm no: 174 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Toros’un vârislerinin babalarından kalan bağı sattıkları Vilâyet-i Anadolu’da Eğin kazâsına tâbi‘ Apçağa nâm karye sâkinlerinden iken bundan akdem hâlik olan Toros v. ( ) nâm zimmînin verâseti sulbî kebîr oğulları Asvador ve Haçuk ve sulbiye kebîre kızı Marot nâm nasrâniyeye münhasıra olduğu şer‘an sâbit oldukdan sonra mezbûrân Asvador ve Haçuk kendi taraflarından asâleten ve mezbûr Haçuk li ebeveyn kız karındaşı mezbûre Marot tarafından husûs-ı âti’l-beyâna vekîl olup Karaman v. Nekal ve Sefer v. Bâli nâm zimmîler şehâdetleri ile şer‘an vekâleti sâbite oldukdan sonra vekâleten meclis-i şer‘-i şerîf-i lâzımü’t-teşrîfde işbu bâ‘isü’s-sifr Marat v. Mardoros nâm zimmî muvâcehesinde her biri asâleten ve vekâleten ikrâr ve takrîr-i kelâm edip tereke-i hâlik-i mezbûrdan olup karye-i mezbûre sınırında Hacılar nâm mevzi‘de vâki‘ bir tarafdan İlbeğ Mustafa mülkü ve bir tarafdan Marko nâm zimmî bağı ve bir tarafdan Kalov nâm zimmî mülkü ve bir tarafdan Vartan nâm zimmî bağı ile mahdûd mülk bağı mezbûr Marat her biri dokuzar dirhem tâmmü’l-vezn ve sahîhü’l-ayâr seksen kıt‘a riyâlî kebîr guruşa bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan meblağ-ı mezbûr seksen kıt‘a riyâlî guruşu mezbûr Marat yedinden ahz u kabz eylediğimizden sonra mebî‘-i mezbûru mahallinde zabt ve tasarrufa mezbûr Marat’ı taslît eyledik min ba‘d zikr olunan bağ merkūm Marat’ın mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelûlâ li sene 1077. Şuhûdü’l-hâl: Şükrullah Bey b. Mustafa, Abdi b. Hüseyin, İbrahim Çelebi b. Mehmed, Hasan Çelebi b. Ahmed, Ömer Beşe, Yusuf Beşe, Hokez v. Serkis, Celyoz v. Marat, Markor v. Parcan, Agya v. Ferhad.