Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 418 Hüküm no: 554 Orijinal metin no: [92a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Abdullah’ın tarla tasarruf hakkını Nikola v. Andriye’ye devretmesi Vilâyet-i Rumeli’nde Avlonya sancağında Arnavud Belgradı kazâsına tâbi‘ Duhanlı nâm karye sâkinlerinden fahrü’l-a‘yân Hasan Bey b. Abdullah nâm cündî meclis-i şer‘de hâmil-i hâze’l-kitâb Nikola v. Andriye nâm zimmî muvâcehesinde ikrâr ve takrîr-i kelâm edip karye-i mezbûre kurbunda Dolyalı nâm mevzi‘de vâki‘ bir tarafdan Dimo v. Nikola tarlasına ve bir tarafdan Vasiko v. Kini tarlasına ve bir tarafdan Niko v. Haniko tarlasına ve bir tarafdan Sako v. Dimo tarlasına müntehî ve mahdûd bir kıt‘a mutasarrıf olduğum tarlanın hakk-ı tasarrufunu sâhib-i arz ma‘rifetiyle mezbûr Nikola’ya tefvîz edip ol dahi tefevvüz ve kabûl eyledikden sonra mukābele-i tefvîzde olan iki yüz nakd-i fıddî-i Osmânî râyic fi’l-vakt akçeyi merkūm Nikola yedinden bi’t-tamâm ve’l-kemâl ahz ve kabz eyledim dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Nikola vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ferhad b. Abdullah, Sinan b. Hasan, Mustafa b. Mehmed.