Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 417 Hüküm no: 553 Orijinal metin no: [92a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kula v. Andriye’nin ev hissesini Petro’nun çocukları Andriye ve Dado’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Mişkolor nâm karye sâkinlerinden Kula v. Andriye nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Andriye ve Dado veledey Petro muvâcehelerinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Dimo v. Kini mülküne ve bir tarafdan çeşmeye ve iki tarafdan tarîk-i âma müntehî iki fevkānî ve iki tahtânî beyti ve samanlığı ve cüneyneyi müştemil mülk menzilden nısf hisse-i şer‘iyye-i şâyi‘amı cümle-i tevâbi‘ ve levâhıkı ve âmme-i menâfi‘ ve merâfıkı ile ale’l-iştirâki’s-seviy merkūmân Andriye ve Dado’ya bin iki yüz elli nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşteriyyân-ı mezbûrânı taslît eyledim ba‘de’l-yevm sâlif[ü’z-zikr] menzil-i mahdûd-ı mezkûrun nısf hisse-i şer‘iyye-i şâyi‘i ale’l-iştirâki’s-seviy merkūmânın mülk-i müşterâ-yı sarîhleridir keyfe mâ yeşâân ve yahtârân mutasarrıf olsunlar dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehümü’l-mezbûrân Andriye ve Dado bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Zilka‘deti’ş-şerîfe li târihi’l-mezbûr. Şuhûdü’l-hâl: Mustafa b. Mehmed, Yakub b. Kurd, Perviz b. Abdullah, Nika [v.] Tanaş, Konidi [v.] Dado, Kika [v.] Nika, Dado [v.] Diro, Kiryaki [v.] Diro, Dimo [v.] Kika, Diro [v.] Köni.